Ganga um fjöll og fjörur í Skotlandi
Sannkölluð lúxus gönguferð í Skotlandi með Wilderness Scotland, einu fremsta ævintýraferðafyrirtæki þar í landi. Dvalið er á 4gra stjörnu gistihúsi allar nætur og farið í dagsgöngur um ævintýralegt landslag norðvestur hluta Skotlands, sem stundum minnir á heimahagana en er að mörgu leyti gjörólíkt. Við njótum gestrisni heimafólks og snæðum kvöldverð á veitingahúsum í Ullapool þar sem það nýjasta í skoskri matargerð er í boði.

Göngurnar eru allt frá þægilegum láglendisgöngum til meira krefjandi fjallgangna en góður stígandi í dagskránni tryggir að enginn ofreynir sig. Sigling um Sumareyjar, eyjaklasa sem liggur skammt undan landi og dregur nafn sitt frá þeim tíma sem sumarbeit var nýtt þar, veitir innsýn í dýralífið, fugla og sjávarspendýr. 

Dagur 1 - Rogie fossar og skógarrölt
Ferðin hefst á lestarstöðinni í Inverness klukkan 10.30 að morgni og ekið er yfir á norðvesturströndina þar sem hópurinn dvelur næstu 6 nætur. Á leiðinni er stoppað og farið í stutta göngu að Rogie fossum í gegnum skóglendi. Eftir að hafa notið fossanna er haldið áfram í gegnum skóginn og upp að Steini, þaðan sem njóta má magnaðs útsýnis yfir svæðið. Gist í tveggjamanna herbergjum á dásamlegu gistihúsi við Loch Broom. Kvöldmatur á veitingahúsi í Ullapool. Hádegisnesti og kvöldverður.
Ganga 7,5 km – 230 m hækkun/lækkun

Dagur 2 - Gengið á Cul Mor
Eftir kröftugan skoskan morgunverð er lagt af stað í göngu dagsins. Við ökum í 30 mínútur áður en við stoppum og leggjum land undir fót og stefnum á hátind Cul Mor. Leiðin liggur eftir þægilegum stíg til að byrja með og svo fylgjum við vörðum síðasta hluta leiðarinnar. Útsýnið til norðurs batnar þeim mun hærra sem við náum og nær hámarki á tindinum sjálfum þar sem ótrúlegt landsvæðið norðan og vestan undan breiðir úr sér eins langt og augu eygja. Eftir að hafa notið útsýnis og fræðst um helstu kennileiti svæðisins liggur leiðin niður á við og dagurinn endar með akstri heim á gistihúsið. Kvöldverður á veitingahúsi í Ullapool eða nágrenni. Morgunverður, hádegisverður og kvöldverður (MHK)
Ganga 14 km – 730 m hækkun/lækkun

Dagur 3 - Sumareyjar og Stac Pollaidh
Dagurinn í dag hefst á akstri til þorpsins Achiltibuie þaðan sem við siglum að Sumareyjum sem liggja skammt undan landi. Sumareyjar draga nafn sitt af þeirri staðreynd að þar var féi beitt yfir sumartímann. Markmið siglingarinnar er að kynnast dýralífinu en þarna er m.a. að finna útsel, hnísur og höfrunga auk skúms, súlu, hafarnar og kríu. Eftir siglinguna liggur finnum við góðan stað fyrir nestispásuna okkar og höldum svo á vit hins einkennilega laga tinds Stac Pollaidh sem er eitt flottasta „smáfjall“ Skotlands. Í lok dags er svo haldið heim á gistihús. Kvöldverður í Ullapool eða nágrenni. MHK.
Ganga 4 km – 440 m hækkun/lækkun

Dagur 4 - Suilven
Í dag er gengið á fjallið Suilven, tilkomumikið fjall norðan við það svæði sem við höfum þegar gengið um. Við höfum dáðst að því úr fjarlægð enda formfagurt fjall og loks komumst við í námunda við það. Gangan að fjallinu tekur uþb 2 klst um þægilegt gönguland áður en við byrjum að hækka okkur upp á fjallsbrúnina og hátindinn. Suilven tekur á enda fremur bratt en enginn verður svikinn af útsýninu. Kvöldverður á veitingahúsi í Inverloch eða nágrenni áður en haldið er heim á gistihúsið. MHK
Ganga 22 km – 910 m hækkun/lækkun

Dagur 5 - Stoerhead og Achmelvich – strandlengjan
Eftir langan en frábæran dag á Suilven er rólegur dagur framundan. Við ökum upp að Stoerhead höfðanum þar sem steindranginn Old man of Stoer er að finna auk gríðarlega fallegs vita sem byggður var af Stevenson sem var einn helsti vitasmiður Bretlands á 19. öldinni. Við göngum eftir sjávarhömrunum að gamla manninum og hugsanlega sjáum við til hvala sem gjarnan sjást á þessum slóðum enda mjög aðdjúpt. Í eftirmiðdaginn höldum við að Achmelvich ströndinni og getum dýft tánum í sjóinn þar. Kvöldverður á veitingahúsi í Inverloc eða nágrenni. MHK
Ganga 7,5 km – 150 m hækkun/lækkun

Dagur 6 - Ben Mor Coigach
Á þessum síðasta göngudegi liggur leiðin á fjallið Coigach, sem er fáfarið þrátt fyrir að hafa allt það sem góð fjallganga krefst. Við ökum í uþb klukkustund áður en við leggjum fjall undir fót og höldum á brattan upp vesturhrygginn. Við þræðum okkur svo austur eftir fjallsbrúninni og gefum okkur góðan tíma til þess að stoppa og njóta útsýnisins, m.a. til Sumareyjanna og Ullapool. Eftir dásemdardag á fjalli er haldið heim á gistihús. Kvöldverður í Ullapool eða nágrenni. MHK
Ganga 15 km – 800 m hækkun/lækkun

Dagur 7 - Ferðalok
Í dag er komið að ferðalokum og við höldum austur til Inverness en gefum okkur tíma til þess að stoppa á leiðinni og viðra okkur. Margar gönguleiðir er að finna og leiðsögumaðurinn velur einhverja sem hæfir aðstæðum. Í Inverness kveðjum við svo ferðafélagana og leiðsögumanninn í eftirmiðdaginn. MH
Ganga 5 km – ~200 m hækkun/lækkun