Hrútsfjallstindar

Fjallganga á Hrútsfjallstinda er í sambærilegum erfiðleikaflokki og ganga á Hvannadalshnúk og er góður kostur fyrir þá sem vilja komast í krefjandi fjallgöngu sem krefst þó ekki tæknilegrar færni. Leiðin býður upp á stórbrotið útsýni yfir Öræfajökul sem og skriðjöklana Svínafellsjökul og Skaftafellsjökul. Þetta er krefjandi og stórkostleg fjallganga um heim jökla og hárra tinda.

Undirbúningsfundur er haldin kl 16:00 daginn fyrir brottför í bækistöð Íslenskra Fjallaleiðsögumanna í Skaftafelli.

Fatnaður:

Ganga á Hrútsfjallstinda tekur að jafnaði 12 til 15 klukkutíma. Búast má við hitastigi á bilinu –10°C og upp í 20°C á hvaða árstíma sem er. Besta leiðin til að búa sig vel undir þennan mikla hitamun er að klæða sig í lögum. Þannig er hægt að fara úr í miklum hita eða auka við fatnað eftir því sem ofar dregur og kólnar.

Það er mjög mikilvægt að klæðast fatnaði næst húðinni sem ekki dregur í sig raka. Ull og ýmis gerviefni reynast mjög vel en bómull er afar slæm hugmynd á fjöllum. Útivistarverslanir bjóða upp á mikið framboð af góðum innanundirfatnaði og geta gefið góð ráð um val á honum. Þunnir langermabolir gefa besta vörn á sólríkum dögum!

Matur og drykkur:

Á meðan á fjallgöngunni stendur er stoppað nokkrum sinnum í lengri og skemmri tíma til að nærast og drekka. Mjög gott er að hafa nesti sem samanstendur af sælgæti, t.d. súkkulaði, sem borða má í stuttum pásum og samlokum sem gefa orku til lengri tíma og hægt er að borða í lengri hléum.

Það er sjaldgæft að göngumenn nái ekki toppnum vegna þreytu. Þegar slíkt kemur fyrir er það venjulega vegna vöðvakrampa. Vöðvakrampar verða til vegna samblands áreynslu, vökva- og steinefnaskorts. Besta leiðin til að koma í veg fyrir krampa er að drekka mikið af vökva.

Æfingar:

Yfirgnæfandi meirihluti þeirra sem leggja í göngu á Hvannadalshnjúk eða Hrútfjallstinda með ÍFLM ná toppnum. Þegar það gerist ekki er það oftast vegna veðurs. Engin ætti þó að vanmeta þessar tindagöngur. Gangan er löng og dagurinn líkamlega erfiður og andlega krefjandi. Jafnvel fyrir fólk í mjög góðu formi!

Allir ættu því að æfa sig áður en lagt er á brattann. Esjan, Móskarðshnúkar, Vífilfell, Skarðsheiði og Akrafjall eru nokkur dæmi um fjöll sem eru aðgengileg og skemmtileg til að byggja upp þol.