Náttúruhlaup í samstarfi við Íslenska Fjallaleiðsögumenn bjóða upp á spennandi hlaupaferð kringum Mt Blanc.

Leiðsögumenn eru þær Elísabet Margeirsdóttir og Halldóra Gyða Matthíasdóttir Proppé.

Verðið á ferðinni er 294.000  fyrir þá sem tilheyra hlaupasamfélagi Náttúruhlaupa eða eru NH vinir, en 309.000 fyrir aðra. Hægt er að gerast NH vinur hér (https://natturuhlaup.arcticrunning.is/hlaupasamfelag/)
Staðfestingargjald er 55.000 kr.

Dagur 1. Ísland – Genf - Chamonix
Ferðin hefst í fjallabænum Chamonix þar sem hópurinn gistir á hóteli fyrstu nóttina og við förum yfir dagleiðir næstu daga. Gisting á 3* hóteli í 2ja manna herbergjum. Kvöldverður ekki innifalinn.

Dagur 2.  Notre dame de la Gorge – Les Chapieux: 22 km og um 1200 m hækkun
Við byrjum ferðina með trompi og skellum okkur strax upp lengsta klifrið í mögnuðu umhverfi alpanna. Hlaupið hefst við Notre Dame kirkjuna og við förum yfir Bonhomme (2329m) og Croix du Bonhomme skörðin (2433m). Á leiðinni fáum við okkur hádegishressingu í Bonhomme skálanum. Eftir hressingu hlaupum við niður í smáþorpið Chapieux (1549m) Þar er gist á farfuglaheimili í dormi.
-Tökum lengsta klifrið á ferskum fótum og upplifum dásemdir alpanna strax á fyrsta hlaupadegi.
-Kvöldverður, morgunverður og gisting í Les Chapieux innifalið. 

Dagur 3. Les Chapieux - Courmayeur (Ítalía): 22 km og um 1200 m hækkun
Við höldum upp Seigne skarðið en það skilur að Frakkland og Ítalíu. Kunnugir tindar eins og Mont-Blanc de Courmayeur, la Noire de Peutrey, les Grandes-Jorasses virðast vera rétt innan seilingar. Við höldum svo niður í Veny dalinn að og fáum okkur góða hádegishressingu í Elisabetta skálanum (2195 m). Skálinn stendur undir skriðjökli og gríðarfallegum tindum sem heita Pýramídarnir. Ef aðstæður eru góðar má taka krók í kringum Pýramídana en þeim spotta var bætt við Ultra-Trail du Mont Blanc hlaupið í fyrra. Við hlaupum næst niður í Veny dalinn framhjá Combal vatninu áður en við höldum upp í næsta skarð. Leiðin héðan og til Courmayeur er líklega ein sú mikilfenglegasta. Fyrir ofan Courmayeur (1226) er skemmtilegur skáli, Maison Veille (1956m), þar sem gott er að fá sér létta hressingu og slaka aðeins á áður en við brunum niður langa brekku í bæinn. Eftir gott bað á hóteli í Courmayeur er upplagt að rölta í bæinn, kíkja á útivistarbúðir og fá sér gourmet ítalska máltíð. Gisting á hóteli í Courmayeur. 
-Gríðarlega flottur alpadagur á leið sem er mjög hlaupanleg. Dásamleg fjallasýn allan tímann og skemmtilegt niðurhlaup til Courmayeur. Algjör gulrót að koma inn á hótel eftir langan dag á fjöllum og hér má verðlauna sig með 7 rétta ítalskri máltíð. 
-Morgunverður og gisting á hóteli í 2ja manna herbergjum. Kvöldverður ekki innifalinn í verði.

Dagur 4. Courmayeur – Bertone – Bonatti skálinn: 12 km og um 790 m hækkun
Þessi dagur verður styttri og léttari en við þurfum að bera með okkur örlítið aukadót fyrir tvo hlaupadaga þar sem enginn vegur liggur til skálans sem við gistum í. Við njótum bróðurhluta dagsins í Courmayeur og stefnum á að vera komin í Bonatti fjallaskálann fyrir kl. 18. Hér gæti veðrið ráðið því hversu snemma við leggjum í hann. Hlaupið hefst úr bænum og við stefnum á Bertone skálann (1989 m) sem stendur á brekkubrúninni. Þar er hægt að fá sér hressingu áður en við skokkum eftir fjallshlíð Ferret dalsins. Við nemum staðar við Bonatti skálann (2025 m) og komum okkur fyrir. Skálinn er einn sá flottasti á TMB leiðinni með frábærri aðstöðu.
-Styttri hlaupadagur þar sem verður lögð áhersla á að njóta Ítalíu og útsýnis.
-Kvöldverður, morgunverður og gisting í Bonatti skálanum innifalið.

Athugið að ekki er bílvegur að Bonatti skála og því pökkum við tannburstanum í hlaupapokann í dag.

Dagur 5. Bonatti skálinn – Ferret skarð - La Fouly: 20 km og um 770m hækkun
Í dag liggur leiðin yfir til Sviss og við höldum áfram inn dalinn að Ferret skarðinu (2537 m). Upplagt er að horfa til baka eftir Veny dalnum og yfir að Seigne skarði áður en við höldum niður samnefndan dal Sviss megin landamæranna. Útsýnið er talsvert annað en við eigum að venjast frá göngu undanfarinna daga og ekki laust við að minni ögn á heimaslóðir. Við gerum stuttan stans við La Peule (2071 m) og getum fengið okkur hressingu þar áður en við höldum áfram til bæjarins La Fouly (1610 m). Hópnum verður skutlað til Champex (1466 m) þar sem við fáum farangurinn okkar og gistum í nótt. Bærinn Champex er vel í sveit settur við lítið fjallavatn og umlukinn skógi. 
-Dásemdar dagur þar sem við klífum yfir til Sviss í stórkostlegu landslagi Veny dalsins.
-Gisting á gistiheimili í 2ja manna herbergjum. Kvöldverður og morgunverður innifalinn. 

Dagur 6. Champex - Trient - Vallorcine: 25 km og um 1500m hækkun
Þessi dagur verður strembinn þar sem við förum yfir tvö skörð á leiðinni. Við höldum frá Champex og förum yfir les Bovines til smábæjarins Trient (1300 m). Hægt er að fá sér hressingu á leiðinni niður til Trient áður en við höldum áfram yfir næsta skarð, Col de Balme (2191m).  Við endum daginn á langri brekku niður til bæjarins Vallorcine (1260 m) og eftir krefjandi dag borðum við góða máltíð og gistum á gistiheimili.
-Langur dagur á flottum stígum þar sem við förum frá Sviss yfir til Frakklands á ný. 
-Kvöldverður, morgunverður og gisting á gistinheimili innifalið. Farangri skutlað frá Champex.

Dagur 7. Col des Mottets – La Flegere – Chamonix: 14 km og um 700m hækkun
Síðasti hlaupadagurinn býður upp á stórbrotið útsýni yfir Chamonix dalinn og Mt. Blanc. Hópnum verður skutlað smá spotta frá Vallorcine til Col des Mottets þar sem leiðin liggur til Tete aux Vents (2130) og La Flegere skálans. Ef veður er gott munum við bæta við stuttum spotta að Lac Blanc sem er aðeins ofar í hlíðinni en þar er stórkostleg náttúra og útsýni. Frá Flegere liggur leiðin nánast beint niður til Chamonix um skemmtilegan skógarstíg. Við hlaupum síðasta spottan með bros á vör að kirkjutorginu þar sem við skálum í kampavíni eftir magnaða viku. 
-Ógleymanlegur hlaupadagur þar sem toppur Mt. Blanc og nálægir tindar blasa við allan tímann. 
-Gisting á hóteli í tveggja manna herbergjum. Kvöldverður ekki innifalinn.

Dagur 8 / Chamonix – Genf – Ísland
Ferðalag heim

Innifalið í verði:
leiðsögn 
upplýsingafundur fyrir ferð
akstur til og frá flugvelli í Genf
gisting og matur eins og kemur fram í ferðalýsingu

Ekki innifalið:
flug til og frá Genf
hádegisverðir
kvöldverður í Chamonix og Courmeyeur