Íslenskir Fjallaleiðsögumenn hljóta starfsviðurkenningu

Starfsmenntaviðurkenning SAF – Samtaka ferðaþjónustunnar 2010 var afhent í þriðja sinn á Degi menntunar í ferðaþjónustu sem haldin var á Grand Hóteli í gær og að þessu sinni hlutu Íslenskir Fjallaleiðsögumenn verðlaunin.  Við erum að vonum óskaplega stolt af þessari viðurkenningu sem er okkur mikil hvatning til að halda áfram á þeirri faglegu og metnaðarfullu braut sí- og starfsmenntunar sem við höfum fetað sl. ár. 

Viðurkenninguna hlutum við fyrir menntun jökla- og fjallaleiðsögumanna og að hafa með skýrri sýn lagt áherslu á mikilvægi starfsmenntunar í allri starfsemi okkar með það að markmiði að auka öryggi, starfsánægju, draga úr starfsmannaveltu  og síðast en ekki síst til að ná samkeppnisforskoti og auka arðsemi í rekstri fyrirtækisins með aukinni starfsmenntun. Í rökstuðningi dómnefndar segir að einkum hafi eftirfarandi legið til grundvallar ákvörðunar um að veita ÍFLM viðurkenninguna:

• Markviss starfsmannaþjálfun með það að leiðarljósi að betri þjálfun starfsfólks skili sér í auknu öryggi
• Ótvíræður árangur starfmannaþjálfunar hvað starfsánægju og minni starfsmannaveltu varðar
• Þjálfunarkerfið er aðlaðandi fyrir metnaðarfullt fjallafólk sem sækir í faglega þjálfun og hefur gert alla stjórnun skilvirkari
• Öflugt samstarf við Nýsjálendinga á sviði þjálfunarstarfs þar sem hugað er að öryggismálum og jafnframt tekur þjálfunin einnig til þjónustu- og gæðaþátta.
• Þrepaskipt nám fyrir starfsfólk sem þarf oft að takast á við erfiðar aðstæður
• Jákvætt viðhorf til símenntunar allra starfsmanna með fræðslukvöldum um margvísleg efni
• Þjálfun og öryggismál verða stærri þáttur í markaðsmálum fyrirtækisins og skapa því ákveðið samkeppnisforskoti gegnum markvissa símenntunarstefnu