Námskeið í almennri fjallamennsku haldið í apríl 2010 - Markmið námskeiðsins er að veita mönnum allhliða grunn í fjallamensku og gera þá hæfari til þess að fara klifur og jöklaferðir á eigin vegum.

Alhliða námskeið í fjallamennsku

Hvenær: 1. - 6. apríl 2010
Hve lengi: 6 dagar.
Hvar: Skaftafelli.

Markmið:
Markmið námskeiðsins er að veita mönnum alhliða grunn í fjallamensku og gera þá hæfari til þess að fara klifur- og jöklaferðir á eigin vegum. Á námskeiðinu er farið yfir efni námskeiðana; Vetrarfjallamennska, Jöklanámskeið, Ísklifur 1 og Ísklifur 2.

Kröfur:
Ekki er gerð krafa um önnur námskeið, en þátttakendur verða að vera í góðu líkamlegu og andlegu formi. Þá verða þátttakendur að mæta í viðeigandi útivistar fatnaði og með viðeigandi viðlegubúnað til vetrarferða. Skráðir þátttakendur fá sendan ítarlegan útbúnaðarlista. 

ATH: Netklúbbsverð og verð til félaga í Íslenska Alpaklúbbnum er 119.900 kr, vinsamlegast hafið samband við dagny@mountainguides.is

Innifalið : Allur sameiginlegur jökla og öryggisbúnaður, 1 leiðbeinandi á hverja 6 þátttakendur,jöklatjöld til notkunar þegar gist er á jöklinum.
Ekki innifalið : Akstur til og frá Skaftafelli, gisting og fæði. Persónulegur jökla/klifurbúnaður, meðfylgjandi listi er aðeins til viðmiðunar. Góður skjólfatnaður til vetrarferða og stífir skór. Svefnpoki, skíðagleraugu, mannbroddar, tvær klifuraxir, klifurbelti, læst karabína, hjálmur.
Hafa í huga : Hægt er að leigja viðeigandi klifurog jöklabúnað hjá Fjallaleiðsögumönnum á Vagnhöfða 7. Til að fá sem mest út úr námskeiðinu er mælt með að þátttakendur mæti í stífum klifurskóm. Kennari áskilur sér rétt til að hafna notkun búnaðar í eigu þátttakenda.
Upphafsstaður : Skaftafell

Dagskrá námskeiðsins
Athugið að dagskráin er aðeins til viðmiðunar. Yfirleiðbeinandi námskeiðsins áskilur sér rétt til að færa efni einstakra daga til eftir aðstæðum og veðri.

Dagur 1
Farið verður yfir uppsetningu trygginga í klifri og fjallamennsku, ferli klifurs, sig með mismunandi sigtólum og öryggishnút. Kynninga á klettaklifri og aðferðum til að klifra upp línur. Dagurinn verður kenndur á klettaklifursvæðinu Hnappavöllum.

Dagur 2
Notkun  mannbrodda, ístryggingar, v-þræðingar, aðferðir við að sveifla og halda á ísöxi og beitingu mannbrodda í mismunandi halla og klifurtækni. Félagabjörgun í jöklaferðum; dobblanir / klifrað upp línu.

Dagur 3
Undirbúningur fyrir tjaldferð. Kynning á mati á snjóflóðahættu/notkun öryggisbúnaðar. Ferðin skipulögð og undirbúin; búnaður, matur, ferðatilhögun, leiðsögutæki og notkun þeirra ásamt öðru tilfallandi. Dagurinn er einnig nýttur til að skerpa á öðrum atriðum fyrir ferðina eins og þurfa þykir, svo sem sprungubjörgun.

Dagur 4:
Farið er upp í hlíðar Öræfajökuls og gist þar eina nótt í tjaldi. Þeir sem vilja geta sofið í snjóhúsi. Á leiðinni er farið í eftirfarandi atriði: notkun ísaxar; að höggva spor; mismunandi aðferðir við að beita öxi í snjóklifri; ísaxarbremsu úr mismunandi stöðum; skjól; að tjalda í snjó og gerð snjóhúsa; göngutækni; hvernig er best að ganga á broddum; troða spor; hækkun á ská / hækkun beint. Í dagslok tekur matseld og annað tilheyrandi við. Kvöldinu varið í umræður. Þeir sem vilja geta sofið í snjóhúsi.

Dagur 5.
Notkun snjóflóðaýlis og stanga, leiðarval með tilliti til snjóflóðahættu og snjótryggingar. Mismunandi snjóakkeri: grafin exi og frosinn vettlingur. Sitjandi tryggingar, snjó- og íspollar. Farið er yfir ferðamennsku á jöklum og aðferðir til að ná félaga úr sprungu.

Dagur 6.
Aftur haldið í skriðjökul og tekist á við bratt ísklifur. Klifur í ofanvaði og leiðsla undir eftirliti kennara. Námskeiðslok verða kl 16:00.