Ferð með bestu mögulegu hæðaraðlögun þar sem ganga á Merufjall áður en tekist er á við sjálft Kilimanjaro hefur sannað gildi sitt.

Í júníbyrjun halda Íslenskir Fjallaleiðsögumenn á ný til Afríku. Nú verður ekki eingöngu tekist á við hæsta fjall Afríku, Kilimanjaro (5895) heldur ætlum við okkur líka að ganga á Merufjall (4566), sem er ekki síður tilkomumikið. Við hefjum ferðina með 4 daga göngu á Merufjall áður en við leggjum í risann sjálfan, Kilimanjaro. Í hlíðum Merufjalls er líklegt að við sjáum til ýmissa villtra dýra. Við teljum að ganga á Merufjall sé góður undirbúningur fyrir Kilimanjaro ekki síst með tilliti til hæðaraðlögunar. Of algengt er að göngufólk komi upp á Kibo sléttuna illa haldið og því ekki í neinu standi til þess að njóta afreksins, tilfinningarinnar að standa á þaki Afríku. Eftir 10 daga vist í faðmi þessara tígulegu fjalla bíður svo 2ja daga ferð á vit villtra dýra um Ngorongoro gíginn og Manyara garðinn, áður en heim er haldið enda ekki hægt að skilja svo við Afríku að skyggnast ekki aðeins um á slóðum Simba og félaga. Óhætt er að segja að við höfum unnið til þessara síðustu daga á villidýraslóðum og getum því notið þægindanna sem þar eru í boði. Um er að ræða 15 daga ferð sem hæglega er hægt að framlengja fýsi fólk að flatmaga á strönd í ferðalok. Myndir úr ferðinni júní 2008 má sjá hér

 
Leiðarlýsing / Bólusetningar / Búnaðarlisti

Gisting:         
- 2 nætur á sveitasetrinu Ngorongoro Farmhouse. Þar er þjónusta á mun hærra stigi en það sem við eigum að venjast hjá ferðaþjónustu bænda. Við erum í hjarta Masaii landsins og ber sveitasetrið keim af því. Rúmgóð herbergin þar sem andi Karenar Blixen svífur yfir vötnunum eru óviðjafnanleg, rétt eins og sundlaugin sem hægt er að svamla í eftir safaríferð dagsins. Trúlega verst að þurfa að yfirgefa þessa paradís.
- 2 nætur á 4stjörnu hóteli, Hotel Impala og Hotel Aishi
- 3 nætur í fjallaskála. Fjallaskálarnir á Merufjalli eru ekki ósvipaðir íslenskum fjallaskálumm, nema hvað ekki er hægt að búast við að þar sé rennandi vatn eða vatnssalerni líkt og víða á Íslandi. Hins vegar er sæmileg svefn- og mataraðstaða.
- 5 nætur í tjaldi. Slegið er upp tjaldbúðum og gist í tveggja manna tjöldum. Matur er til- og framreiddur í matartjaldi. Engin baðaðstaða og frumstæð salernisaðstaða. Allur búnaður; tjöld, dýnur og eldunar- og mataráhöld eru borin af burðarmönnum.

Innifalið : Íslensk fararstjórn, staðarleiðsögn Flug til og frá Íslandi. Allur matur nema hádegisverður á fyrsta degi í Tansaníu. Allur akstur erlendis eins og fram kemur í leiðarlýsingu. Öll gisting eins og tekið er fram í leiðarlýsingu. Tjaldbúnaður, eldunaráhöld og annar sameiginlegur búnaður. Öll þjóðgarðsgjöld (Kili þjóðgarður, Arusha Þjóðgarður og Ngorongoro og Manyara safarísvæðin). Öryggisbúnaður þar með talinn færanlegur þrýstiklefi (gamow bag)
Hafa í huga : Hópstærð: 6 - 16 manns

Dagur 1-2: Brottför frá Íslandi. Við fljúgum til London Heathrow þar sem við höfum val um að dvelja á flugvellinum eða skreppa inn í bæ. Nauðsynlegt er þó að vera komin aftur á Heathrow 3 tímum fyrir brottför til Nairobi eða um fimmleytið. Við lendum í Nairobi, Kenýa, í dagrenningu og fljúgum eftir skamma stund áfram til Tanzaníu þar sem staðarleiðsögumaður tekur á móti okkur og við förum á hótel. Eftirmiðdagurinn er frjáls til þess að skoða sig um í Arusha, gist á hóteli.
Dagur 3: Í dag hefst fyrsta fjallgangan okkar. Við ökum að Momella hliði þar sem við reimum skóna okkar almennilega og göngum um undirhlíðar Merufjalls upp í Maria Kamba skálann þar sem við gistum. Enginn ætti að láta sér bregða þó hann sjái gíröffum, buffölum, fílum eða sebrahestum bregða fyrir, þarna eru við á heimaslóðum þessara dýra.
Dagur 4: Áfram er haldið upp hlíðar Merufjalls sem er eldfjall sömu gerðar og Mt. St. Helen á vesturströnd Bandaríkjanna. Má sjá menjar um svipuð hamfaragos í Merufjalli og við þekkjum frá St Helen. Við nemum staðar í Söðulkoti (Saddle Hut), skála í 3820 m hæð og fyrir þá sem ekki hafa fengið nóg af göngu dagsins er í boði að fara á Litla Merutindinn. Hinir geta tekið því rólega og látið líða úr sér fyrir hátindinn.
Dagur 5: Við tökum daginn snemma og höldum á fyrsta tindinn okkar, hátind Merufjalls (4566m). Um er að ræða næturgöngu undir stjörnum prýddum himni um tilkomumikið landslag. Hátindinum ættum við að ná í dögun og útsýnið yfir gíg Merufjalls og gresjurnar í kring fylla okkur lotningu og stolti yfir afreki okkar. Þegar allir hafa fengið nægju sína af útsýni höldum við niður á við og töltum alla leið í Maria kamba skálann þar sem við gistum.
Dagur 6: Við höldum áfram að lækka okkur og komum fyrr en varir að Momella hliðinu þar sem bíll bíður okkar og flytur okkur á hótelið þar sem við gistum í nótt. Hótelið er búið öllum helstu þægindum og ekki er úr vegi að skella sér í sundlaugina og njóta þess að láta vatnið leika við sig, hugleiða gönguna á Merufjall og spá í það sem framundan er.
Dagur 7: Í dag hefst ganga okkar á Kilimanjaro, hæsta fjall álfunnar sem við höfum eingöngu virt fyrir okkur úr fjarlægð hingað til. Við ökum að Machame hliðinu (1800m), opinberum upphafspúnkti fjallgöngunnar, þar sem gengið er frá leyfum og búnaði dreift á burðarmenn. Fyrsta dagleiðin leiðir okkur í gegnum regnskóg þar sem hægt er að koma auga á ýmsar framandi fuglategundir og hugsanlega líka apa. Eftir 4 – 6 klst göngu komumst við út úr laufþykkninu og nemum skömmu síðar staðar við Machame skálann (3000m) þar sem við komum okkur fyrir í tjöldum.
Dagur 8: Við höldum áfram upp til Shire (3800m) og göngum um dæmigert alpalandslag, þar sem koma má auga á kunnuglegar plöntur eins og hvönn og lyng. Á þessari dagleið er líklegt að við fáum fyrsta almennilega nasaþefinn af Kibo, hásléttunni sem Uhuru tindur situr á.
Eftir 5 – 7 klst göngu komum við í náttstað og getum haft það náðugt í tjaldbúðunum.
Dagur 9: Í dag göngum við upp að Hraunturninum (Lava tower, 4500m) sem er hæsti púnktur dagleiðarinnar og þeir sem vilja geta freistað þess að klífa turninn. Landslagið verður hrjóstugra eftir því sem ofar dregur og því er tiltekinn léttir að lækka sig aftur niður og feta stíga þar sem framandi þykkblöðungar bera við himin. Þykkblöðungar þessir hafa yfir sér einhvern ævintýrablæ og virðast á stundum hálf manneskjulegir. Við gistum í tjaldbúðunum Barranco (3950m).
Dagur 10: Nú fer að styttast í toppinn og dagleiðin í dag gæti eins verið á reginfjöllum Íslands, enda fer afskaplega lítið fyrir gróðri. Við þokumst upp að Barafu (4600m) þar sem við komum okkur fyrir í tjöldum og bíðum spennt eftir því að loka áfanginn á toppinn hefjist.
Dagur 11: Þetta verður langur dagur sem við tökum snemma. Um miðnætti er borin fram morgunhressing og fyrr en varir erum við lögð af stað með ennisljós undir stjörnubjörtum himninum. Leiðin upp á Stellu strýtu (5700m) ætti að taka 4 – 6 klst og ógleymanlegt er að standa á Kibo sléttunni og horfa á sólina koma upp. Frá Stellustrýtu er uþb klukkustundar gangur að Uhuru, Frelsistindi, og þar getum við minnst frelsisbaráttu okkar Íslendinga. Eftir að hafa notið útsýnis og hátindavímunnar leggjum við af stað niður í Barafu, þar sem okkar bíður hressing áður en við höldum áfram niður fjallið áleiðis að Mweka hliðinu. Gistum í Mweka tjaldbúðunum þessa seinustu nótt á Kilimanjaro.
Dagur 12: Við töltum niður að Mweka hliði þar sem okkar bíður bíll sem flytur okkur yfir til Ngorongoro svæðisins vestur af Arusha. Við komum okkur fyrir á Ngorongoro bændabýlinu þar sem ekki er stundaður neinn hefðbundinn búskapur lengur heldur ferðaþjónusta. Þarna erum við komin í híbýli í anda Karenar Blixen og getum aldeilis notið þeirra þæginda sem í boði eru.
Dagur 13: Í dag hefst safaríferðin okkar og við heimsækjum Ngorongoro gíginn, þar sem tölfræðin sýnir eitt hæsta hlutfall séðra dýra. Í gígnum sem í raun er risastór askja er að finna ótrúlegan fjölda tegunda villtra dýra auk fjölda dýra innan hverrar tegundar. Gisting á Ngorongoro bændabýlinu.
Dagur 14: Við höldum áfram að safna dýrum í dag og ökum um Manyara svæðið fram eftir degi, en í eftirmiðdaginn höldum við til Arusha og í flug til Kenýa og áleiðis til Íslands.
Dagur 15: Við lendum í London í morgunsárið og tökum fyrstu vél heim til Íslands og ættum að lenda þar í eftirmiðdaginn.

Kilimanjaro er hæsta fjall Afríku þar sem það gnæfir i 5895m hæð. Fjallið er staðsett á landamærum Tansaníu og Kenýa. Ganga á Kilimanjaro leiðir ferðafólk um ólík gróðurbelti og vistkerfi, í gegnum regnskóga undirhlíðanna upp í gróðursnautt landslagið sem einkennir efri hlíðar fjallsinsNafnið Kilimanjaro þýðir á Swahili Skínandi Fjallið og var fyrst gengið á það 1889. Kilimanjaro er hæsta frístandandi fjallið í heiminum,  rís um 4.600m yfir nánasta umhverfi sitt og býður því upp á stórkostlegt útsýni. Sagan segir að af tindinum megi greina kringlulögun jarðar með berum augum!
Merufjall (4566) er eldfjall staðsett 70km vestur af Kilimanjaro. Síðasta gos átti sér stað fyrir uþb 100 árum en fyrir 8000 árum var geysilegt hamfaragos sem sprengdi nánast alla austuhlíð fjallsins. Merufjall er í miðju Arusha þjóðgarðsins. Skógivaxnar hlíðar fjallsins eru heimkynni fjölda tegunda villtra dýra og þar er að finna yfir 400 ólíkar fuglategundir.Ganga á Merufjall er á allra færi og kjörin til þess að aðlagast hæð áður en gengið er á Kilimanjaro.
Veðrátta: Kilimanjaro er aðeins þrem gráðum suður af Miðbaugi og því undir miklum áhrifum frá heitum vindum svæðisins. Þótt að þar sé ávallt heitt í veðri þarf að muna að það eru tvö regntímabil sem eiga sér stað hvert ár. Mest rignir frá mars fram í endaðan maí. Þetta er svokallaður Monsoon-tími! Minna rignir í seinna regntímabilinu en það stendur yfir frá október til lok nóvember. Meðalhiti við rætur fjallsins er 25°- 30°C en á hátindinum getur hitinn verið á bilinu +10° C til -20°C. Í 3000m hæð er hitinn oftast 5°-15°C en um nætur má búast við að hiti fari undir frostmark. Nauðsynlegt er að gera sér grein fyrir þeim hitamun sem bæði er eftir tíma sólarhringsins sem og hæð.
Heilsa og hreinlæti: Hreinlæti heimamanna í ferðaþjónustu er mjög gott og líklega er óhætt að borða allt sem boðið er upp á, þar með talið ávextir og grænmeti. Ekki er þó ráðlegt að skipta við götusölufólk sem kann að hafa ýmislegt lostæti í boði við fyrstu sýn. Nauðsynlegt er að hugsa vel um vökvabúskap líkamans í fjallagöngum og drekka minnst 2 l á meðan á göngu stendur. Ekki er ráðlegt að drekka úr fjallalækjum hversu freistandi sem það kann að virðast heldur drekka soðið vatn, eða setja þartilgerðar vatnshreinsitöflur í drykkjarvatnið.
Bólusetningar: Mælt er með að ferðafólk til Tansaníu hafi hefðbundnar barnasprautur í lagi, mænusótt, stífkrampa og barnaveiki. Að auki er ráðlegt að láta bólusetja sig fyrir lifrarbólgu A og janvel B, taugaveiki (typhoid) og Gulu (Yellow Fever). Malaríulyf er nauðsynlegt að verða sér úti um en ekki er til nein bólusetning gegn malaríu. Mörgum hefur reynst lyfið Malaron vel. Ráðfærið ykkur við heimilislækni eða Heilsugæsluna sem sinnir ferðamannabólusetningum (5851300, símatími 9 – 10 og 15 – 16, daglega nema um helgar). Athugið að gott er að huga að bólusetningum fyrr en síðar! Margir bregða á það ráð að taka lyf sem auðvelda hæðaraðlögun, eins og t.d. lyfið Diamox. Við leggjum ekki dóm á gæði þess en bendum fólki á að ráðfæra sig við lækni sinn varðandi töku á því.
Háfjallaveiki:
Flestum sem ferðast í hæð yfir 2500 – 3000m hættir til að finna fyrir vægum einkennum háfjallaveiki sem lýsa sér m.a. í höfuðverk, ógleði og lystarleysi. Til þess að lágmarka líkur á háfjallaveiki er mikilvægt að huga að góðri aðlögun sem felst í því að hækka sig jafnt og þétt, sofa í hæð og síðast en ekki síst, drekka nægan vökva. Ef alvarlegri einkenni háfjallaveiki gera vart við sig er eina lausnin tafarlaus lækkun. Íslenskir Fjallaleiðsögumenn leggja metnað sinn í það að tryggja sem besta hæðaraðlögun allra og tekur öll dagskrá ferða mið af því takmarki.
Matur: Allur matur, nema hádegisverður þegar við dveljum á hótelum, er innifalinn í ferðinni og við mælum með því að þátttakendur komi með sætindi og orkunasl með sér að heiman. Hugsanlega þarf líka að huga að orkudrykkjum, enda te og kaffi einu drykkirnir sem í boði eru á fjalli.
Vegabréfsáritun:  Vegabréfsáritunar er krafist fyrir Íslendinga til Tansaníu. Hægt er að kaupa vegabréfsáritun við komuna til Tansaníu. Verðið er uþb US$ 50. Ef einhverjir vilja sækja um vegabréfsáritun til Tansaníu fyrirfram er það gert í sendiráði Tansaníu Stokkhólmi, þar er síminn + 46 8 732 83 10. Ef fólk hefur tíma og aðstöðu til að sækja um áritun fyrirfram er það fínt en samkvæmt öllum upplýsingum sem við höfum er þetta ekki vandamál, áritunin fæst keypt við komuna til landsins.
Þjórfé og ferðapeningar: Gjaldmiðill landsins er Tansanískur Schilling. Reikna má með 1000 til 1200 schillingum á US$1. Allir stærri hlutir eru greiddir í US$ en gott er að skipta minni upphæðum í Schillinga til að hafa í þjórfé á veitingastöðum og önnur smáútgjöld. Sum hótel taka við krítarkortum (helst VISA) en þó er ekki hægt að treysta á það alls staðar. Hraðbankar eru í helstu borgum þó þarf að hafa það í huga að einhver munur er á milli banka hvort þeir taki VISA eða Mastercard. Öruggast er að sjálfsögðu að vera búinn að byrgja sig upp af dollurum áður en lagt er af stað frá Íslandi og þá ekki síður smærri einingum gjaldmiðilsins. Sjálfsagt er að huga að þjórfé handa starfsliði því sem fylgir hópnum á fjallið. Gott er að miða við US$5 handa burðarmönnum,  US$10 handa aðstoðarleiðsögmönnum kokki og eitthvað meira handa yfirleiðsögumanni á dag. Þá má ekki gleyma því að heimamenn geta gert sér mat úr notuðum fatnaði og skóm.
Farangur: Merkja skal allar töskur vel og kanna eftir öll tengiflug hvort töskur séu enn á réttri leið (Transfer-desk flugvalla geta hjálpað við það).
Hertar reglur varðandi handfarangur: Gott er að lesa bækling Flugmálastjórnar um hertar reglur varðandi handfarangur! Þær upplýsingar er að finna hér 
Símasamband: GSM samband er víðast hvar á svæðinu
Flugtímar: Flugtími á milli London til Nairobí er uþb 8 ½ klst.