Greenland Skiing Tours

Hápunktar

Verð frá: 150.000 ISK

Skíðaganga í stórkostlegu umhverfi hárra fjalla Ammassalik eyju á Austurströnd Grænlands.

Eftir tæplega 2 klst. flug frá Reykjavík er lent í sannkölluðum draumaheimi gönguskíðafólks, þar sem snævi þakin fjöll og ísilagðir firðir skarta sínu fegursta. Stemningin er ólýsanleg, í þessu mikilfenglega landslagi og ekki spillir að menning heimafólks er sveipuð sannkallaðri dulúð.
Byggðin á Ammassaliksvæðinu er ein sú afskekktasta á öllu Grænlandi. Þó íbúar séu vissulega með báða fætur í nútímanum eimir þó enn eftir af ævafornri menningu þeirra sem ekki kemur á óvart ef haft er í huga að þetta er einmitt sá kimi Grænlands sem hvað síðast komst í tengsl við vestræna menningu. Margir Inúítanna á þessu svæði lifa enn af veiðum og þriflegir sleðahundar eru oft helsta stolt heimafólks. Hér er tilvalin ferð fyrir þá sem vilja stutta en áhrifamikla gönguskíðaferð á svæði sem er gjörólíkt Íslandi.

Innifalið : Íslensk fararstjórn og leiðsögn, flug Reykjavík - Kulusuk - Reykjavík, allur matur, öll gisting eins og tekið er fram í leiðarlýsingu.
Ekki innifalið : Eigin búnaður samkvæmt búnaðarlista, drykkir og persónuleg eyðsla, ferða- slysa eða farangurstrygging, önnur þjónusta/afþreying sem ekki er tekin fram í dagskrá. Ath: Með fyrirvörum um breytingar á flugi vegna veðuraðstæðna í Kulusuk, gott er að geta reiknað með degi til vara. Íslenskir Fjallaleiðsögumenn bera ekki ábyrgð á kostnaði sem af slíkri röskun getur hlotist.
Hafa í huga : Hópstærð 6 - 16 manns
Upphafsstaður : Reykjavik domestic airport.

Hápunktar

Verð frá: 150.000 ISK

Dagur 1. Reykjavík – Kulusuk:
Flogið til Kulusuk þar sem lent um hádegisbil. Við spennum á okkur skíðin um leið og við komum út úr flugstöðinni og höldum á gistiheimili í þorpinu þar sem við dveljum allan tímann. Þegar búið er að ganga frá farangri er haldið í létta skíðagöngu um vesturhluta eyjarinnar. Sjálft þorpið og umhverfi þess skoðað í krók og kring. ~ 3 klst á skíðum.
Dagur 2. Apusiaajik eyja:
Við skíðum yfir sundið sem skilur Kulusuk frá Apusiaajik eyju og virðum fyrir okkar stórkostlega borgarísjaka sem sitja fastir í ís sundsins. Þegar komið er yfir að Apusiajiik er gengið upp á flatan jökul í um 300m hæð. Þaðan er gengið á milli stórkostlegra 900 m hárra graníttinda með frábæru útsýni yfir á meginlandið og nálægar eyjar. Til baka er skíðað um þröngan fjörð aftur til Kulusuk. Þetta er skíðagöngudagur sem á fáa sína líka. ~ 7 til 8 klst. á skíðum
Dagur 3. Cap Dan:
Skíðaganga þvert yfir Kulusukeyju yfir á Cap Dan þar sem eitt sinn var radarstöð. Þar er gríðarlega gott útsýni til allra átta. Magnaðir oddhvassir graníttindar sjást svo langt sem augað eygir og hafís og borgarísjakar þekja yfirborð hafsins. Ómótstæðileg og falleg stemning sem líður seint úr minni. ~ 6 klst. á skíðum
Dagur 4. Kulusuk – Reykjavík:
Við tökum daginn snemma og skíðum nú um norðurströnd Kulusukeyjarinnar. Enn og aftur njótum við fegurðar gríðarstórra borgarísjaka sem hafa strandað í sundunum við Kulusuk og þessarar óræðu kyrrðar sem ríkir á snæbreiðunum. Nú er um að gera að drekka í sig hughrifin því eftir að hafa náð í farangurinn liggur leiðin heim. ~ 3 klst ganga á skíðum.

Búnaðarlisti

Hápunktar

Verð frá: 150.000 ISK

Ammassaliksvæðið er einn af fáum stöðum á austurströndinni sem hefur verið í byggð síðustu 4000 árin. Engum sögum fer af samskiptum Íslendinga og inúíta svæðisins fyrr en á síðustu öld, sem ekki er svo undarlegt mtt þess að byggðin var í rauninni ekki uppgötvuð fyrr en um 1880, þegar Danir komu á svæðið. Einangrun svæðisins var með ólíkindum og jafnvel svo að íbúar byggðarinnar héldu að þau væru eina fólkið í heiminum. Þó svo að ýmsar breytingar hafi orðið á samfélaginu á Ammassalik síðan að Danir komu sér fyrir þar, eimir enn eftir af veiðimanna lífsstílnum, sem stundum jafnvel tekur völdin. Nafnið Ammassalik er nátengt veiðimannasamfélaginu því það þýðir einfaldlega staðurinn þar sem loðnan er!

Veðrátta:

Veðurfar á Ammassalikeyju stjórnast að miklum hluta af rekísnum sem liggur landfastur fram á sumarið og veldur því að höfnin í Tasiilaq er lokuð mestan hluta árs. Ísinn veldur oft þoku með ströndinni í eftirmiðdaginn þegar hitastigið lækkar en þokan hverfur rétt eins og döggin um leið og sólin kemur upp. Meðalhitinn í mars/apríl er á bilinu mínus 6°C til mínus 3°C en vænta má hærra hitastigs með sólskini.

Matur:

Allur matur er innifalinn í ferðinni. Rétt er að benda fólki á að taka með sér orkunasl til þess að narta í yfir daginn ef vill.
Gjaldmiðillinn í Grænlandi er dönsk króna og gott að hafa eitthvað af slíkum krónum handbært hyggist fólk versla við heimamenn en hægt er að greiða með greiðslukorti í Kaupfélaginu í Kúlusúk

Farangur:

Samkvæmt upplýsingum frá Flugfélagi Íslands eru eftirfarandi reglur í gildi fyrir farangur:

Innritaður farangur: Flugfarþegar mega innrita 20 kg. af farangri án þess að greiða yfirvigt. Flugkortshöfum Flugfélags Íslands er heimilt að koma með 30 kg. án þess að greiða yfirvigt. Á þetta við bæði í innanlandsflugi og millilandaflugi. Athugið að hámarksþyngd á hvern hlut er 20 kg.
Flugfélagið vill minna flugfarþega á að merkja allan farangur til að hann skili sér örugglega í réttar hendur.

Vegabréf:

Íslenskir ríkisborgarar þurfa ekki að hafa vegabréf með sér til Grænlands en nauðsynlegt er að vera með persónuskilríki meðferðis.