Dagur 1: Flogið frá Reykjavík til Narssarsuaq Við göngum niður að höfn og tökum bát yfir til Qagssiarssuq, Bröttuhlíðar þar sem við komum okkur fyrir á gistiheimili staðarins. Eftirmiðdagsganga um þessar merku söguslóðir þar sem við skoðum m.a. Eiríksstaði og Þjóðhildarkirkju. Gist á gistiheimili og allur farangur er trússaður. Göngutími 2 – 3 klst.
Dagur 2: Við kveðjum Bröttuhlíð og höldum vestur til Tasiusaq, Við fylgjum fjölda stöðuvatna þar sem jafnan má sjá silunga vaka og virða fyrir sér fjölskrúðugt fuglalíf svæðisins. Þetta er létt ganga og í Tasiusaq komum við okkur fyrir hjá grænlenskum ferðaþjónustubónda og snæðum svo hádegisverð áður en við höldum í könnunarferð um nágrennið. Allur farangur trússaður. Göngutími 6 – 7 klst. Veiðimöguleikar í fallegri, lítilli á seinni part dags.
Dagur 3: Við göngum í dag yfir til Nunataaq. Leiðin liggur um fjárgötur og víða má sjá leifar af hleðslum og vegbótum þeim sem norrænir menn unnu að forðum. Eftir stutta göngu komum við til Nunataaq þar sem við komum okkur fyrir hjá öðrum bónda áður en við höldum í skoðunarferð. Við göngum upp á heiðina Nunakullak þar sem stórkostlegt útsýnið á eftir að koma á óvart. Við horfum yfir fjörðinn Tasiusaarsuk sem er lítill innfjörður. Þar sem fjörðurinn er þrengstur er kjörið að nema staðar og snæða í þessu óviðjafnanlega útsýni og drekka fegurðina í sig um leið. Sjónarspilið er stórkostlegt: misstórir ísjakar á reki fram og til baka, oft á talsverðri ferð þegar flæðir að og frá. Sem fyrr er allur farangur er trússaður. Göngutími 6 klst. Veiðimöguleikar í sjó, stutt frá gististaðnum.
Dagur 4: Frá Nunataaq liggur leiðin til Igaliku, hins forna biskupsseturs Garða. Fyrst göngum við yfir grónar heiðar með fjölda lítilla fjallavatna til þorpsins Sillisit. Þaðan tökum við svo bát yfir til Itilleq. Frá Itilleq göngum við eftir Konungsveginum, yfir eiðið til Garða þar sem við komum okkur fyrir á farfuglaheimili. Garðar eru afskaplega vel í sveit settir á grösugu láglendi innst í Einarsfirði. Tígulegur tindur Illerfissalik sem gnæfir, handan fjarðar setur svo sannarlega svip sinn á bæjarbraginn. Allur farangur trússaður. Göngutími 7 klst. Veiðimöguleikar um kvöldið í á sem er uþb 2 km. frá gistihúsinu.
Dagur 5: Daginn notum við til þess að kynnast betur hinu stórfenglega umhverfi norðan við Garða. Við fylgjum ánni úr Vatni 90 upp á hásléttuna sem er í rúmlega 200m hæð. Við njótum tilkomumikils útsýnis yfir Qooqqut fjörðinn en í botni hans er skriðjökull sem kelfir í sjó fram og fjörðurinn því jafnan fullur af borgarísjökum. Þegar við höfum fengið okkur fullsödd af þessu óviðjafnanlega útsýni snúum við til baka og þræðum brúnir sléttunnar til Igaliku þar sem við gistum aftur á farfuglaheimilinu. Göngutími 8 klst. Veiðimöguleikar í ánni úr Vatni 90.
Dagur 6: Í dag skundum við á söguslóðir og skoðum okkur um í Hvalsey. Í stað þess að leggja land undir fót teygjum við úr skönkunum um borð í báti sem flytur okkur á milli Garða og Hvalseyjar. Við njótum bátsferðarinnar frá Görðum og virðum fyrir okkur tilkomumikil fjöllin beggja vegna við Einarsfjörðinn. Við höfum nægan tíma til þess að rölta um rústir þessara söguslóða en hér í Hvalsey er að finna heillegasta mannvirki sem norrænir menn skildu eftir sig. Við höldum svo til höfuðstaðar S. Grænlands Qaqortok, sem hefur það orð á sér að vera fallegasti bærinn á öllu Grænlandi. Hérna í Qaqortok gistum við á farfuglaheimilinu og getum notað eftirmiðdaginn og kvöldið til þess að skoða okkur um. Göngutími 2 – 3 klst. veiðimöguleiki fyrir fótfráa í Tasersuaq vatninu seinni hluta dagsins og um kvöldið.
Dagur 7: Í dag stígum við aftur um borð í bát og nú er ferðinni heitið til baka til Narsarsuaq. Við siglum norður Eiríksfjörðinn og getum látið hugann reika til dagleiða liðinna daga á meðan við njótum mikilfenglegs útsýnisins. Við komum til Narsarsuaq komum við okkur fyrir á farfuglaheimilinu og eigum svo frjálsan tíma það sem eftir er dags. Um kvöldið er upplagt að kynna sér grænlenska matarhefð og menningu og val fyrir hópinn að bragða á þjóðarréttum Grænlendinga af hlaðborði hótelsins.
Dagur 8: Við tökum saman föggur okkar í dag og höldum heim en áður en við kveðjum Grænland göngum við inn að Kuussuup Serma jöklinum. Leiðin liggur um grónar grundir Blómsturdals sem eru geysilegar andstæður við hrjóstur jökulsins. Útsýnið yfir jökulinn er ógleymanlegt og eflaust hægt að eyða heilli dagstund þar en enginn má verða of seinn í flug og því fáum við bíl til þess að ná í okkur inn að jökli. Flogið heim. Göngutími 3 – 4 klst.
English
Íslenska
