Gengið umhverfis Mont Blanc. Þessi vinsælasta gönguferð Evrópu er einstök upplifun enda fjallasalir Alpanna magnaðir

Íslenskir Fjallaleiðsögumenn bjóða upp á eina vinsælustu gönguferð í Evrópu í júlíbyrjun. Þetta er gönguferð umhverfis hið fornfræga fjall Mont Blanc, þar sem heildarvegalengdin er uþb 170 km og heildarhækkunin 10km. Ferðin byrjar og endar í bænum Chamonix í Frakklandi en leiðin liggur að auki um Ítalíu og Sviss en Mont Blanc stendur á mörkum þessara þriggja landa. Gengið er um dali og fjallaskörð þar sem hver dagur býður upp á nýja sýn á Mont Blanc. Löng hefð er fyrir því að ganga umhverfis Fjallið Hvíta og hægt að velja um þrjár mismunandi leiðir þar sem helsti munurinn felst í gönguhæðinni. Við förum milliveginn og tökum millileiðina sem er að meðaltali í 2000 metrunum. Samkvæmt dagskránni sem hér fylgir þá er í vændum stórskemmtileg og stórfengleg 7 daga gönguferð umhverfis rætur þessa tilkomumikla fjalls. Á göngunni er gist og borðað í fjallaskálum sem léttir pokana talsvert því hvorki þarf að svefnpoka né mat, nema nesti til dagsins.

Búnaðarlisti
  

Innifalið : Flug frá Íslandi til Genfar og akstur til Chamonix Öll gisting eins og fram kemur í dagskrá Allur matur nema kvöldverður á fyrsta og síðasta degi ferðar. Öll lyftu-, strætó- og lestargjöld Sameiginlegur búnaður, línur og tryggingar
Hafa í huga : Hópstærð: 6 - 15 manns

D1. Keflavík – Chamonix
Eftirmiðdagsflug frá Keflavík til Genfar þangað sem við ættum að koma uþb 22:30. Leiðin liggur áfram til Chamonix í fylgd staðarleiðsögumanns þar sem við gistum á 3* hóteli þessa fyrstu nótt okkar í faðmi Alpanna.

D2. Chamonix – Les Houches – Col de Tricot – Chalets de Miage
Við höldum af stað í langþráða gönguna eftir leiðsögumaður okkar hefur farið yfir ferðatilhögun, búnað og öryggisatriði. Farið er með strætó til Les Houches og kláfi upp til Bellevue þaðan sem við göngum niður til Bionnassay jökulsins. Tilkomumikil hengibrú er svo upphafið að göngunni upp í Tricot skarðið (2119m). Allan tímann getum við dáðst að mikilfenglegu útsýninu yfir Alpasalina þar sem mest ber á Bionassay nálinni og Gouter tindinum. Niður úr skarðinu höldum við til Miage skálans þar sem við gistum í nótt. Gert er ráð fyrir uþb 5 tíma göngu, 450m hækkun, 600m lækkun.

D3. Chalets de Miage – Armancette – Nant Borrant
Leiðin í dag liggur um svæði á milli Mont Blanc og Beaufortain. Við getum notið óviðjafnanlegs útsýnisins eða látið hugann reika langt aftur í aldir því við fylgjum forn rómverskum vegi upp að Nant-Borrant skálanum (1460m). Gert er ráð fyrir uþb 5 tíma göngu, 800m hækkun og 600m lækkun.

D4. Nant Borrant – Col des Fours – Les Chapieux
Við göngum upp í Bonhomme skarð (2329m) sem opnar leiðina að suðurhluta fjallasvæðisins. Útsýnið á þessum hluta leiðarinnar er ómótstæðilegt en við höldum áfram Fours skarð (2716m) og svo áleiðis um Téte des Fours og Dal Jöklanna (Vallée des Glaciers) að skálanum í Les Chapieux (hæð). Gert er ráð fyrir uþb 7 tíma göngu, hækkun er 1300m og lækkun 800m.

D5. Les Chapieux – col de la Seigne – Mont Fortin – Col Chécrouit
Áfram höldum við og fyrst liggur leiðin í gegnum stórgrýtt La Seigne skarðið og svo þaðan niður í Vény dal, sem liggur í suðaustur hlíðum Mont Blanc. Ef okkur miðar vel á göngunni er möguleiki á að ganga á fjallið Mont Fortin (2758m). Gisting í fjallaskálanum Maison Vieille. Gert er ráð fyrir uþb 7 tíma göngu, 1100m hækkun og 900m lækkun.

D6. Col Chécrouit – Courmayeur – Arnuva – col Ferret - Champex
Eftir að hafa gengið niður í ítalska fjallaþorpið Courmayeur tökum við rútuna til Arnuva, í botni ítalska dalsins Val Ferret. Þaðan göngum við upp í skarðið Grand Col (Stóra skarðið 2537m). Þetta gefur okkur flott útsýni yfir suðurhluta af fjallagarðinum Grandes Jorasses og fjallið Mont Dolent sem hefur þá sérstöðu að eiga landamæri að þrem löndum ; Ítalíu, Sviss og Frakklandi. Síðan höldum við niður í dalinn Val Ferret í Sviss (1740m), þaðan sem við erum við flutt í rútu á gistihús í Champex sem liggur í dalnum Val d´Arpette (1640m). Upplagt er að nota það sem eftir lifir dags til þess að skoða sig um í þessu snotra Alpaþorpi. Gert er ráð fyrir uþb 6 tíma göngu, 800m hækkun og 800m lækkun.

D7. Champex – Fenetre d´Arpette – Trient – Tré le Champs
Skarðið Fenetre d´Arpette (2665m) eru dyr okkar að lokaáfanga ferðarinnar. Úr skarðinu göngum við í þorpið Trient (1280m) og getum á þeirri leið, notið útsýnisins yfir jökulföllin ofan við okkur (í góðri fjærlægð). Úr Trient þorpinu fáum við flutning yfir til þorpsins Tré-le-Champs, ofan við Chamonix dalinn. Þar gistum við í skála og ættum að hafa tækifæri til þess að fylgjast með ógleymanlegu sólarlaginu þar sem Mont Blanc skartar sínu fegursta í forgrunni. Gert er ráð fyrir 7 tíma göngu, 1000m hækkun og 1200m lækkun.

D8. Tré le Champs – Lac Blanc – La Flégére - Chamonix - Keflavík
Á þessum síðasta degi hækkum við okkur aftur og höldum í átt að skarðinu Le Grand Balcon Sud í Náttúruverndarsvæðinu des Aiguilles Rouges (Rauðu Nálarnar). Útsýnið á þessum slóðum ætti ekki að svíkja neinn og við getum notið þess og góðrar hvíldar við Vatnið Hvíta (Lac Blanc, 2352m). Þar gefst okkur líka einstakt útsýni yfir fjallgarðinn Aguilles de Chamonix (Chamonix Nálarnar). Í dagslok göngum við svo niður að La Flegére og Chamonix þar sem við getum sest niður á einn af mörgum veitingastöðum bæjarins og látið líða úr okkur áður en við höldum til Genfar í kvöldflugið heim. Gert er ráð fyrir 6 tíma göngu, 900m hækkun og 1200m lækkun.

Almennt Mont Blanc var lengi vel talið hæsta fjall Evrópu og var vel komið að þeim titli enda geysilega tígulegt og mikilfenglegt fjall. Árið 1786 var Mt. Blanc fyrst klifið af þeim félögum Balmat og Paccard. Í kjölfarið myndaðist hefð fyrir ferðum á fjallið þar sem heimamenn sáu um að leiðsegja aðkomufólk á tindinn. Fyrsta konan til þess að komast á tindinn var Marie Paradis árið 1808. Að meðaltali ganga um 20.000 manns á tindinn árlega og því mætti ætla að um auðveldan tind væri að ræða. Hins ber þó að geta að enginn ætti að vanmeta fjallið eða tindinn sjálfan enda eru hlutar leiðarinnar upp varasamir og full þörf á því að vera með fjallaleiðsögumann með í för. Leiðin í kringum Mt. Blanc er talin ein af bestu gönguferðum í Evrópu og trúlega á stórkostlegt útsýnið á Mt. Blanc og nágranna tindana sinn þátt í því.
    
Bærinn Chamonix er í 1035m hæð en nokkrir litlir bæir eru í Chamonix dalnum, t.d. Les Houches, Le Tour og Argentier. Svæðið tilheyrir Rhone-Alps héraðinu og er í Haute-Savoie sýslunni, sem er eins og mörg önnur svæði Frakklands þekkt fyrir vín og reyktar svínapylsur. Fjölmarga veitingastaði er að finna í Chamonix og þar búa um 10.000 manns. Chamonix er þekkt fyrir að vera höfuðstaður heimsins fyrir fjallamennsku, gönguferðir, klifur, fjallahjólaiðkun og allar tegundir af vetraríþróttum. Alpasafnið er við sama torg og Saint-Michel kirkjan og er vel þess virði fyrir þá sem vilja rifja upp sögu nútíma fjallamennsku, frá 1786 til dagsins í dag, að heimsækja safnið. Um þessar mundir er þar mjög áhugaverð sýning um jökla og áhrif hlýnandi veðurfars sem vert er að kíkja á. Upplýsingamiðstöð ferðamála er við sama torg og kirkjan og safnið. Hægt er að kynna sér hvað bærinn hefur upp á að bjóða hér

Veðrátta: Sumarhitastigið á Mt. Blanc svæðinu er jafnan á milli 15° til 24°C, kvöldhitinn fellur þó oft niðurundir frostmark. Í Ölpunum, rétt eins og hér heima má búast við snöggum breytingum í veðráttu. Ekki er óalgengt að fólk upplifi það að ganga í sól og hita sem breytist fyrirvaralaust í göngu í rigninug eða jafnvel slyddu. Því er nauðsynlegt að búa sig líkt og fyrir íslenskar aðstæður og gleðjast þegar sólin skín og ekki þarf að nota vetrarklæðin.

Matur og Drykkur: Allur matur er innifalinn í ferðinni fyrir utan kvöldverð í Chamonix síðasta kvöldið. Athugið að nauðsynlegt er að kaupa drykkjarvatn í skálunum því við mælum ekki með því að drekka vatnið beint úr fjallalækjunum. Þá má ekki gleyma því að vökvaþörfin er alltaf mikil í gönguferðum og eykst að mun þegar ferðast er í meiri hæð en vanalegt er. Við mælum með því að drekka minnst 2 lítra á dag á meðan á göngu stendur og auðvitað drekka meiri vökva í skálunum bæði kvölds og morgna. Þá er ekki úr vegi að hafa með sér orkunasl eftir því sem fólki þykir þurfa.

Skálar: Aðbúnaður í skálunum sem við gistum í er misjafn, sumir eru svipaðir skálum á hálendi Íslands með útikamri og engu rennandi vatni en aðrir líkjast meira gistiheimilum með sturtum, rafmagni og öðrum nauðsynlegum þægindum. Í öllum skálum fá gestir skálaskó og því er óþarfi að bera inniskó með sér. Í skálunum er einnig að finna eitthvert lesefni (reyndar mest á frönsku) og spil til að stytta sér stundir þegar slakað er á eftir erfiðan dag.

Svefnbúnaður: Óþarfi er að bera svefnpoka með sér þar sem þykk og góð teppi eru til staðar í skálunum. Samt er mælt með að taka með sér lakapoka upp á þægindi að gera.

Landakort: Hægt er að kaupa landakort í fjölda verslanna í Chamonix. Það eru Série Verte n° 53 Grenoble Mt-Blanc, TOP 25 n° 3630 OT Chamonix og n° 3531 ET St-Gervais

Þjórfé og ferðapeningar: Debetkort og kreditkort eru nothæf á langflestum stöðum í Ölpunum, líka í fjallaskálunum. Ekki er venja eð veita þjórfé í fjallaskálum í Evrópu en þegar það er gert þá er það oftast gert til þess að jafna upphæðina

Hertar reglur varðandi handfarangur: Gott er að lesa bækling Flugmálastjórnar um hertar reglur varðandi handfarangur!
Símasamband: GSM samband er víðast hvar í Ölpunum
 
Ekki innifalið í verði:
Kvöldverður á fyrsta og síðasta degi og hádegisverður á öðrum degi
Eigin útbúnaður eins og fram kemur í útbúnaðarlista
Ferða-, slysa- og farangurstryggingar
Drykkir, orkufæði og nasl
Annað sem ekki er nefnt í innifalið
 
Aukagreiðslur vegna:
Eins manns herbergis á hóteli er 12.900 kr.