-Skýjum ofar á hátindi Mont Blanc. Hátindur gömlu Evrópu er heillandi takmark og pottþétt hæðaraðlögun tryggir ánægjulegan toppadag!

Ganga á Mont Blanc, Fjallið Hvíta, hátind Vestur Evrópu. Ferðin byrjar og endar í bænum Chamonix og telur sjö heila göngudaga. Mikill ævintýrabragur er á Chamonix, vöggu fjallamennskunnar. Hér safnast saman ævintýrafólk fráöllum heimshornum til að reyna sig við Alpafjöllin, sem gnæfa tilkomumikil yfir bænum. Höfuð og herðar yfir allt saman ber að sjálfsögðu fjallakóngurinn Mont Blanc, Fjallið Hvíta eins og það útleggst á máli heimamanna. Mont Blanc er hæsta fjall Vestur Evrópu 4808m og þó að ganga á tindinn taki ekki nema dag er nauðsynlegt að gefa sér nokkra daga til undirbúnings, kynnast fjallinu og nágrönnum þess. Til þess að komast á tind Mont Blanc er mikilvægt að aðlagast þunna loftinu á skipulagðan og öruggan hátt. ÍFLM er eitt fremsta fjallaleiðsögufyrirtækið á Íslandi og hefur átt farsælt samstarf við franskan ferðaþjónustuaðila sem hefur á sínum snærum þaulreynda fjallaleiðsögumenn á svæðinu. Samkvæmt meðfylgjandi dagskrá er hæðaraðlögunin tryggð með stórskemmtilegum og stórfenglegum 5 daga göngutúr við rætur fjallsins áður en lagt er á tindinn sjálfan. Á göngunni er gist og borðað í fjallaskálum sem léttir pokann mikið. Til þess að tryggja öryggi þátttakenda er einn fjallaleiðsögumaður á hverja 6 þátttakendur alla dagana nema toppadaginn. Þá er það einn fjallaleiðsögumaður á hverja tvo.

www.flickr.com icelandicmountainguide''s Mt. Blanc 2008 photoset

Innifalið : Flug til Genfar/Parísar og svo áfram til Chamonix annað hvort með bíl, lest eða flugi. Allur matur nema kvöldverður á fyrsta og síðasta degi ferðar og hédegisverður á síðasta degi. Öll lyftu, strætó og lestargjöld Háfjallaleiðsögumaður á hverja 6 þátttakendur Háfjallaleiðsögumaður á hverja 2 þátttakendur á toppadegi Tæknilegur búnaður; klifurbelti, gönguöxi, göngubroddar og hjálmur Sameiginlegur jökla og klifurbúnaður, línur og tryggingar Öll gisting eins og tekið er fram í dagskrá
Hafa í huga : Hópastærð 4 - 12 manns

Dagur 1. Keflavík - Chamonix
Flogið til Genfar þar sem staðarleiðsögumaður tekur á móti hópnum og fylgir á hótel í fjallabænum Chamonix. Gisting á þægilegu 3* hóteli

Dagur 2. Chamonix – Albert Fyrsti
Eftir morgunmat gefst tími til þess að fara yfir ferðatilhögun og búnað með Gregory áður en lagt er í´ann. Við förum með almenningsvagni upp í þorpið Le Tour, þaðan sem kláfur er tekinn upp í Balme fjallaskarðið. Í skarðinu fáum við smjörþefinn af því sem koma skal, mikilfenglegt fjallasvæðið blasir við augum. Eftir að hafa notið útsýnisins er gengið upp í fjallaskála sem kenndur er við Albert Fyrsta (2702 m). Í eftirmiðdaginn gefst færi á því að æfa ísaxarbremsu og broddabrölt. Gert er ráð fyrir því að gangan taki 2 – 3 klst, hækkun er 500m.

Dagur 3. Albert Fyrsti – Aiguille du Tour – Trient Skáli
Lagt af stað í býtið og gengið sem leið liggur eftir jökli upp í skarðið sem kennt er við fjallið Turninn (le Tour). Skarðið er í 3280 m hæð og handan þess er sjálfan Turninn að finna (Aguille du Tour 3542) og spurning hvort að við gerum okkur ferð þar upp áður en við leggjum af stað yfir Trient hásléttuna þar til komið er að Trient skálanum (3170). Gert er ráð fyrir uþb 5 tíma göngu, hækkun er 800 m og lækkun 200m.

Dagur 4. Trient skáli – Fenêtre de Saleina – Fenêtre du Tour – Chamonix
Trient hásléttan leiðir okkur að rótum skarðsins Fenêtre de Saleina (3267m) og handan þess upp bratta en stutta brekku, beina leið upp í Fenêtre du Tour (3400m). Fjallasýnin er tilkomumikil, og hægt að dást endalaust að norðurhlið Argentiere og Saleina jökulkvosinni umkringdri tindafjöld. Niðurleiðin er svo leikur einn en við göngum að kláfnum í Balme skarðinu og tökum hann niður til Chamonix. Við höldum á 3* hótel og getum skolað af okkur fjallarykið áður en við tökumst á við næstu tinda. Gert er ráð fyrir 5 – 6 tíma göngu, hækkun 550m og lækkun 1400m.

Dagur 5. Chamonix – Montenvers – Mer de Glace – Mer de Glace – Tacul jökull – Requin skáli
Frá Chamonix höldum við með lest upp til Montenvers (1909 m) þaðan sem komast má að Íshafinu (Mer de Glace) sem enginn Alpafari má missa af. Úr þessum jökuldal hækkum við okkur upp til Moulins og áfram að Tacul jökli og upp í Requin skálann. Sérlegir stigar hafa verið settir upp svo að leiðin upp í skálann ætti ekki að reynast ofviða neinum. Skálinn er staðsettur á óviðjafnanlegum útsýnisstað og auðveldlega má teyga í sig útsýnið yfir hið mikilfenglega Geant ísfall. Gert er ráð fyrir 5 tíma göngu, hækkun 900m.

Dagur 6. Requin skáli – Vallée Blanche – Midi skarð – Cosmiques skáli
Nú erum við svo að segja stödd í hjarta fjallaklasans sem er gegnheill ís. Við þræðum okkur á milli jökulsprungna og jökulborga þegar við göngum upp Dalinn Hvíta (Vallée Blanche) allt þar til við komum upp í Midi fjallaskarðið (3532 m), þaðan sem auðveld leið er upp að Cosmique skálanum (3613m). Gert er ráð fyrir 5 ½ tíma göngu, hækkun 1100m

Dagur 7. Cosmiques skáli – Mont Blanc du Tacul – Mont Maudit – Mont Blanc - Chamonix
Þá er það sjálfur toppdagurinn! Við höldum af stað löngu fyrir birtingu, og það eru ennisljósin sem lýsa okkur leið fyrsta kastið á meðan stjörnuskinið víkur fyrir dagrenningunni. Leið okkar er kennd við hin Þrjú Hvítu Fjöll (les Trois Mont-Blanc) og liggur úr Midi skarðinu, yfir öxlina á Mont Blanc du Tacul (4248m). Svo höldum við í gegnum Maudit skarðið og upp brattar brekkur Mont Maudit (4465m), sem er tæknilega erfiðasti kafli ferðarinnar. Eftir þennan hjalla liggur leiðin niður í Brenva skarðið og þaðan síðustu brekkuna upp á sjálfan Toppinn: Mont Blanc (4808m). Af efsta tindi liggur leiðin niður að Bellevue kláfnum (hæð) um svokallaða Gouter leið. Við tökum kláfinn niður í dal og náum rútu til baka til Chamonix þar sem langþráð sturta bíður okkar og þar sem við getum skálað fyrir stórkostlegum árangri okkar og horft til fjallatindanna umhverfis þennan heillandi fjallabæ. Gert er ráð fyrir 10 tíma göngu, hækkun 1300m og lækkun 2450m. 

Dagur 8. Chamonix - Genf - Keflavík
Þennan síðasta dag í Ölpunum er upplagt að skoða sig um í Chamonix, þessa snotra bæjar sem gjarnan hefur verið nefndur vagga fjallamennskunnar enda hafa ófáir menn og konur stigið sín mikilvægustu spor einmitt á götum bæjarins. Dagurinn er frjáls og það eina sem við þurfum að hafa í huga er að vera komin í tæka tíð til Genfar flugvallar fyrir kvöldflugið heim.

Almennar upplýsingar:
Mont Blanc var fyrst klifið árið 1786 af þeim félögum Balmat og Paccard. Í kjölfarið myndaðist hefð fyrir ferðum á fjallið þar sem heimamenn sáu um að leiðsegja aðkomufólk á tindinn. Fyrsta konan til þess að komast á tindinn var Marie Paradis árið 1808. Að meðaltali ganga um 20.000 manns á tindinn árlega og því mætti ætla að um auðveldan tind væri að ræða. Hins ber þó að geta að enginn ætti að vanmeta fjallið eða tindinn sjálfan enda eru hlutar leiðarinnar upp varasamir og full þörf á því að vera með fjallaleiðsögumann með í för.
 
Chamonix:
Bærinn Chamonix er í 1.035m hæð en nokkrir litlir bæir eru í Chamonix dalnum, t.d. Les Houches, Le Tour og Argentier. Svæðið tilheyrir Rhone-Alps héraðinu og er í Haute-Savoie sýslunni, sem er eins og mörg önnur svæði Frakklands þekkt fyrir vín og reyktar svínapylsur. Fjölmarga veitingastaði er að finna í Chamonix og þar búa um 10.000 manns. Chamonix er þekkt fyrir að vera höfuðstaður heimsins fyrir fjallamennsku, gönguferðir, klifur, fjallahjólaiðkun og allar tegundir af vetraríþróttum. Alpasafnið er við sama torg og Saint-Michel kirkjan og er vel þess virði fyrir þá sem vilja rifja upp sögu nútíma fjallamennsku, frá 1786 til dagsins í dag, að heimsækja safnið. Um þessar mundir er þar mjög áhugaverð sýning um jökla og áhrif hlýnandi veðurfars sem vert er að kíkja á. Upplýsingamiðstöð ferðamála er við sama torg og kirkjan og safnið. 
 
Veðrátta:
Sumarhitastigið er oftast á milli 15° til 24°C. Kvöldhitinn fellur oft niður í -10°C. Í Ölpunum má búast við snöggum breytingum í veðráttu. Ekki er óalgengt að fólk upplifi það að ganga í sól og hita breytist fyrirvaralaust í göngu í rigninug eða jafnvel snjókomu. Athugið að sum skörðin sem farið er um eru í það mikilli hæð að snjókoma er ekki ólíkleg. Á toppadeginum má búast við miklum kulda, enda erum við í mikilli hæð. Ekki er ólíklegt að hitastigið falli niður fyrir 20 gráðu frost og reikna verður með vindkælingu.
 
Háfjallaveiki:
Háfjallaveiki er atriði sem vert er að hafa í huga þegar ferðast er í hæð yfir 2500 – 3000 metrum. Flestir upplifa trúlega væg einkenni háfjallaveikinnar sem lýsa sér m.a. í höfuðverki, ógleði og lystar­leysi. Góð aðlögun er besta leiðin til þess að komast hjá háfjallaveikinni, það að hækka sig ekki um of hvern dag og hvílast vel í hæð. Einnig kemur mikil og stöðug vökvaneysla að gagni. Ágerist einkennin er eina leiðin tafarlaus lækkun.
 
Matur:
Allur matur er innifalinn í ferðinni (fyrir utan kvöldverð og hádegisverð á hóteli í Chamonix). Samt er gott að gera ráð fyrir auka kostnaði í drykki (líklega ekki ódýr bjórinn í fjallaskálunum). Athugið að nauðsynlegt er að kaupa drykkjarvatn í skálunum því alls ekki er mælt með að drekka vatnið beint úr fjallalækjunum. Vökvaþörfin er alltaf mikil í gönguferðum og eykst þegar ferðast er í hæð. Við mælum með því að drekka minnst 2 lítra á dag á meðan á göngu stendur og auðvitað að drekka meira vökva í skálunum bæði kvölds og morgna.
 
Svefnbúnaður:
Óþarfi er að bera svefnpoka með sér þar sem þykk og góð teppi eru til staðar í skálunum. Samt er mælt með að taka með sér lakapoka upp á þægindi að gera.
 
Þjórfé og ferðapeningar:
Gjaldmiðillinn í Frakklandi er evra og sjálfsagt að vera með evrur í farteskinu frá Íslandi. Debetkort og kreditkort eru nothæf á langflestum stöðum í Ölpunum, líka í fjallaskálunum. Ekki er venja eð veita þjórfé í fjallaskálum í Evrópu en þegar það er gert þá er upphæðin oftast til að jafna upphæðina í jafna tölu.
 
Landakort:
Hægt er að kaupa landakort í fjölda verslana í Chamonix. Það eru TOP 25 n° 3630 OT Chamonix og n° 3531 ET St-Gervais.
 
Farangur:
Merkja skal töskur vel og kanna eftir öll tengiflug hvort töskur séu enn á réttri leið (Transfer-desk flugvalla geta hjálpað við það). Sá farangur sem ekki er tekinn með í ferðina verður geymdur í Chamonix þar sem hann mun bíða okkar.
 
Hertar reglur varðandi handfarangur:
Gott er að lesa bækling Flugmálastjórnar um hertar reglur varðandi handfarangur!
 
Símasamband:
GSM samband er víðast hvar í Ölpunum.
 
Í verðinu er ekki innifalið:
Eigin útbúnaður eins og fram kemur í útbúnaðarlista
Ferða-, slysa- og farangurstryggingar
Drykkir, orkufæði og nasl
Annað sem ekki er nefnt í innifalið
 
Aukagreiðsla vegna:
Eins manns herbergis á hóteli er 11.900 kr.