Á eigin vegum er ferðamáti sem hentar fólki sem kýs meiri sveigjanleika og treystir sér til þess að fylgja leiðarlýsingu og kortum á milli áfangastaða. Kjörið fyrir pör, vini eða fjölskylduna.

-Á eigin vegum umhverfis Mont Blanc

Í Hjarta Evrópu er Mont Blanc fjallaklasann að finna. Ekki er nóg með að klasi þessi teygi sig yfir landamæri Frakklands, Ítalíu og Sviss heldur leynast þar líka einhverjir mögnuðastu fjallasalir veraldar. Löng hefð er fyrir fjallamennsku á svæðinu og ekki skemmir að menningarleg fjölbreytni á vart sinn líka sem skýrir að einhverju leyti þann fjölda af göngufólki og klifurköppum sem leggja leið sína um þessa mikilfenglegu fjallasali. Tæpast þarf að nefna að hæsti tindurinn Mont Blanc var lengi talinn hæsti tindur Evrópu og telst reyndar enn hæsti tindur Vestur Evrópu.

Þessi ferð er í boði frá júnílokum til septemberloka og miðast við tvo ferðalanga.

Leiðin umhverfis Mont Blanc er þægileg ferð því alla jafna er gengið eftir stígum sem auðveldar fólki að njóta ferðarinnar út í ystu æsar. Flestir eru stígarnir í góðu ásigkomulagi en þó eru hlutar leiðarinnar torfærari enda farið er um skriður, snjó og jafnvel aur. Til þess að þátttakendur njóti ferðarinnar sem skyldi ættu þeir að vera í þokkalega góðu formi og vanir göngu um mismunandi land í öllum veðrum enda hefur það löngum verið sagt um Mt Blanc fjalllendið að þar geti fólk upplifað veður allra árstíða á einum og sama deginum.  

Hafa í huga : Brottfarir miðast við lágmark 2 ferðalanga og eru í boði frá júnílokum til septemberloka.

Leiðarlýsing:
Þátttakendur fá ferðalýsingu, kort og alla nauðsynlegar þjónustubeiðnir, því fyrirfram er búið að bóka gistingu, akstur og helstu máltíðir. Þátttakendur er ábyrgir fyrir eigin öryggi en fá neyðarsímanúmer sem hægt er að hringja í allan sólarhringinn. Þetta er trússuð ferð svo þátttakendur eru eingöngu með dagpoka með sér á göngu en annar farangur er fluttur á milli skála. Sá farangur má þó ekki vega meira en 12kg.

Dagur 1. Keflavík –Chamonix
Síðdegisflug til Genfar. Við komuna þangað er haldið í höfuðstað Alpanna, fjallabæjarins Chamonix þar sem við gistum þessa fyrstu nótt okkar á þægilegu 3* hóteli.
Dagur 2. Chamonix – Les Houches – Tricot skarð – Miage skálar – Contamines Montjoie.
Á þessum fyrsta göngudegi tökum við því rólega og getum verslað nesti og fleira áður en lagt er af stað upp í fjöllin. Fyrst tökum við strætó til Les Houches og síðan kláf upp í Bellevue. Þaðan er stutt ganga niður að Bionnassay jökli þar sem hengibrúin er vegvísir að áframhaldandi göngu upp í Tricot skarðið sem er í 2119 m hæð. Á leiðinni er um að gera að njóta mikilfenglegs útsýnisins til Aiguille de Bionassay og Dome de Gouter. Áður en leiðin liggur niður til Montjoie er líka upplagt að stoppa við Miage skálana og dást að þessum mögnuðu fjallasölum. Gist á gistiheimili í þorpinu Contamies Montjoie sem er vert að skoða betur. Ganga 6 klst. hækkun 550m, lækkun 1150 m.
Dagur 3. Contamines MontJoie – Notre Dame de la Gorge – Les Chapieux.
Gengið er upp MontJoie dalinn framhjá tilkomumikilli fjallalkirkju frá 15. öld. Áfram er haldið yfir brú frá tímum Rómverja og upp að Croix de la Bonhomme í 2454 m hæð. Hér er um að gera að njóta útsýnisins yfir mikilfenglega fjallasalina hærra förum við ekki í dag heldur höldum áfram niður að Les Chapieux þar sem gist er í skála eða á gistiheimili. Ganga 7 klst, hækkun 1300m, lækkun 800m.
ATH: Hægt er að fá skutl frá Contamines MontJoie bæ og upp að kirkjunni eða taka strætó.
Fyrir þá sem eru gönguglaðir er upplagt að ganga alla leið í Fours skarð og á Téte des Fours í 2728 m. þá bætast 1 ½ klst við heildargöngutímann.
Dagur 4. Les Chapieux – Seigne skarð – Chercrouit skarð.
Dagurinn hefst með ökuferð upp í Mottets fjallaskálann. Þar hefst gangan sem í dag liggur að ítölsku landamærunum í Seigne skarði í 2515m. Þar ættum við að stoppa og drekka í okkur mikilfenglegt útsýnið þar sem Brenva hlíð Mont Blanc er hvað tilkomumest. Við höldum svo niður í Veny dal áður en stígurinn hlykkjast upp á við að hreint ógleymanlegum stað, hugsanlega þeim eftirminnilegasta í allri ferðinni. Þetta er Checrouit skarðið þaðan sem ítalski hluti Mont Blanc fjallgarðsins blasir við með sjálfan Mont Blanc í forgrunni fjölda annarra mikilfenglegra tinda og jökultungna. Gist í skálanum í Checrouit skarði. Ganga 6 klst. hækkun 950m, lækkun 500m
Dagur 5. Checrouit skarð – Courmayeur – Arnuva – Grand Ferret skarð – Champex
Ganga niður til Courmayeur, hinnar ítölsku miðstöðvar Mont Blanc svæðisins (hægt að taka kláf niður). Hérna í þessum ítalska ys, getum við keypt okkur hádegisverð og eitthvað góðgæti til næstu daga áður en við tökum strætó eftir Ferret dal til Arnuva þar sem gangan hefst á nýjan leik og nú er stefnan tekin á Grand Ferret skarðið 2537m. útsýnið hérna er ekki amalegt, Jorasses, Augille Talefre og Mont Dolent ber við himin. Við lækkum okkur niður í Sviss að La Foully þorpi þar sem við tökum strætó til Chamex þorps þar sem við gistum í Nótt. Ganga 6 klst. hækkun 800m, lækkun 800m.
Dagur 6. Champex d´en Haut – Fenetre d´Arpette eða Bovine engi – Trient.
Í dag er hægt að velja á milli tveggja kosta, annars vegar um háheiðar Bovine engja þaðan sem njóta má útsýnar yfir Rónar dalinn og hins vegar erfiðari leið upp og yfir stórkostlegan Arpette gluggann 2637m. þaðan blasir mikilfenglegur Trient jökullinn við. Af báðum leiðum er magnað útsýni yfir Svissnesku Alpana og engin nauðsyn að taka ákvörðun um hvaða leið er valin fyrr en á sjálfum göngudeginum.
ganga um Bovine engin 5klst, hækkun 700m, lækkun 850m.
Ganga um Arpette gluggann 7 klst. hækkun 1000m, lækkun 1200m.
Dagur 7. Trient – Balme skarð – Les Frettes – Tré le Champ
Ganga frá Trient upp í Balme skarðið 2190m og yfir til Frakklands á nýjan leik. Ekki þarf að fjölyrða um útsýnina úr skarðinu, hún er mögnuð. Chamonix dalurinn og tindarnir umhverfis eru hreint ótrúleg sjón. Haldið áfram niður eftir Les Frettes hryggnum í þorpið Tré le Champ þar sem gist er á gistiheimili. Ganga ~5.5 klst. hækkun 900m, lækkun 800m.
Dagur 8. Tré le Champ – Blanc vötn – Chamonix – Genf – Keflavík.
Þessi síðasti dagur okkar í Ölpunum er ekki af veri endanum. Við höldum upp til hinna heimsfrægu Blanc vatna eftir hinum mikilfenglegu Suðursvölum þaðan sem útsýnið er ómótstæðilegt, við blasa tindar, dalir og jöklar. Hinar stórkostlegu nálar Aguille Verte og Chamonix nálarnar og daljöklarnir Tour, Argentiere og Íshafið. Á leið okkar í gegnum Aguille Rouges friðlandið er líklegt að fráar fjallagemsur svæðisins verði á vegi okkar áður en við höldum um furuskóg áfram niður til Chamonix. Nægur tími gefst til þess að skoða sig um í þessum heillandi fjallabæ áður en haldið er til Genfar flugvallar og í kvöldflugið heim. Ganga 6 klst. hækkun 900m, lækkun 1200m.

Chamonix: Bærinn Chamonix er í 1035m hæð en nokkrir litlir bæir eru í Chamonix dalnum, t.d. Les Houches, Le Tour og Argentier. Svæðið tilheyrir Rhone-Alps héraðinu og er í Haute-Savoie sýslunni, sem er eins og mörg önnur svæði Frakklands þekkt fyrir vín og reyktar svínapylsur. Fjölmarga veitingastaði er að finna í Chamonix og þar búa um 10.000 manns. Chamonix er þekkt fyrir að vera höfuðstaður heimsins fyrir fjallamennsku, gönguferðir, klifur, fjallahjólaiðkun og allar tegundir af vetraríþróttum. Alpasafnið er við sama torg og Saint-Michel kirkjan og er vel þess virði fyrir þá sem vilja rifja upp sögu nútíma fjallamennsku, frá 1786 til dagsins í dag, að heimsækja safnið. Um þessar mundir er þar mjög áhugaverð sýning um jökla og áhrif hlýnandi veðurfars sem vert er að kíkja á. Upplýsingamiðstöð ferðamála er við sama torg og kirkjan og safnið.
http://www.chamonix.fr/animationculture/museealpin.html#anchor 
 
Mont Blanc var lengi vel talið hæsta fjall Evrópu og var vel komið að þeim titli enda geysilega tígulegt og mikilfenglegt fjall. Árið 1786 var Mt. Blanc fyrst klifið af þeim félögum Balmat og Paccard. Í kjölfarið myndaðist hefð fyrir ferðum á fjallið þar sem heimamenn sáu um að leiðsegja aðkomufólk á tindinn. Fyrsta konan til þess að komast á tindinn var Marie Paradis árið 1808. Að meðaltali ganga um 20.000 manns á tindinn árlega og því mætti ætla að um auðveldan tind væri að ræða. Hins ber þó að geta að enginn ætti að vanmeta fjallið eða tindinn sjálfan enda eru hlutar leiðarinnar upp varasamir og full þörf á því að vera með fjallaleiðsögumann með í för. Leiðin í kringum Mt. Blanc er talin ein af bestu gönguferðum í Evrópu og trúlega á stórkostlegt útsýnið á Mt. Blanc og nágranna tindana sinn þátt í því.
 
Veðrátta: Sumarhitastigið á Mt. Blanc svæðinu er jafnan á milli 15° til 24°C, kvöldhitinn fellur þó oft niðurundir frostmark. Í Ölpunum, rétt eins og hér heima má búast við snöggum breytingum í veðráttu. Ekki er óalgengt að fólk upplifi það að ganga í sól og hita sem breytist fyrirvaralaust í göngu í rigninug eða jafnvel slyddu. Því er nauðsynlegt að búa sig líkt og fyrir íslenskar aðstæður og gleðjast þegar sólin skín og ekki þarf að nota vetrarklæðin.
 
Skálar: Aðbúnaður í skálunum sem við gistum í er misjafn, sumir eru svipaðir skálum á hálendi Íslands með útikamri og engu rennandi vatni en aðrir líkjast meira gistiheimilum með sturtum, rafmagni og öðrum nauðsynlegum þægindum. Í öllum skálum fá gestir skálaskó og því er óþarfi að bera inniskó með sér. Í skálunum er einnig að finna eitthvert lesefni (reyndar mest á frönsku) og spil til að stytta sér stundir þegar slakað er á eftir erfiðan dag.
 
Svefnbúnaður: Óþarfi er að bera svefnpoka með sér þar sem þykk og góð teppi eru til staðar í skálunum. Samt er mælt með að taka með sér lakapoka upp á þægindi að gera.
 
Landakort: Hægt er að kaupa landakort í fjölda verslanna í Chamonix. Það eru Série Verte n° 53 Grenoble Mt-Blanc, TOP 25 n° 3630 OT Chamonix og n° 3531 ET St-Gervais.
 
Þjórfé og ferðapeningar: Debetkort og kreditkort eru nothæf á langflestum stöðum í Ölpunum, líka í fjallaskálunum. Ekki er venja eð veita þjórfé í fjallaskálum í Evrópu en þegar það er gert þá er það oftast gert til þess að jafna upphæðina.
 
Farangur:Nauðsynlegt er að merkja allar töskur vel og kanna eftir öll tengiflug hvort töskur séu enn á réttri leið (Transfer-desk flugvalla geta hjálpað við það). Sá farangur sem ekki er tekinn með í ferðina verður geymdur í Chamonix þar sem hann mun bíða okkar.
 
Hertar reglur varðandi handfarangur:
Gott er að lesbækling Flugmálastjórnar um hertar reglur varðandi handfarangur!
 
Símasamband: GSM samband er víðast hvar í Ölpunum