Á eigin vegum er ferðamáti sem hentar fólki sem kýs meiri sveigjanleika og treystir sér til þess að fylgja leiðarlýsingu og kortum á milli áfangastaða. Kjörið fyrir pör, vini eða fjölskylduna.

-Við rætur Pýreneafjallanna
 
Á milli fjalls og fjöru er leið sem býður göngufólki upp á að sameina göngur og strandlíf á heillandi strandlengju, Frakklands og Spánar sem þó er hvorki franskt né spænskt heldur einfaldlega katalónskt. Landslagið er litríkt og fjölbreytilegt í fjöllum og dölum þessa austasta hluta Pýreneafjallanna sem bókstaflega hrynja niður í Miðjarðarhafið. Menningin er afar sérstæð og fólk ætti að fá góða innsýn á göngu um vínakra, gljúfur, þorp og hafnarbæi þar sem ekki eingöngu reynir á sjón heldur líka líka lyktar- og bragðskynið. Ekki ætti að skemma að svæðið hefur að meðaltali 300 sólskinsdaga á ári! Sannkölluð ævintýraferð um svæði sem ekki lét ómerkari menn en Matisse, Maillol, Míró, Dalí og Picasso ósnortna. Þetta er þægileg gönguferð þar sem dagleiðir hvers dags eru hóflegar þannig að í lok hvers göngudags gefst nægur tími til þess að slappa af og njóta hinna heillandi sjávarþorpa þar sem gist er.
 
Brottfarir miðast við flug til Barcelona og 2 ferðalanga
 
Tekið er á móti fólki við komuna til Barcelona og því er ekið til Collioure þar sem staðarleiðsögumaður afhendir kort og fer yfir ferðalýsingu með fólki. Svo fyllsta öryggis sé gætt fá ferðalangar neyðarnúmer sem hægt er að hringja í allan sólarhringinn komi eitthvað upp á.

Ljósmyndir á Flickr myndveitunni

Innifalið : Flug Keflavík - Barcelona - Keflavík, móttaka og akstur til Collioure, akstur frá Cadaqes til Barcelona, ferðagögn og leiðarlýsing

Leiðarlýsing:
D1: Keflavík – Collioure
Komið til þessa sjarmerandi bæjar í eftirmiðdaginn. Collioure er einstaklega vel í sveit settur, við rætur Pýreneafjallanna og strendur Miðjarðarhafsins. Bærinn var á tímabili heimili listamanna á borð við Matisse og ber þess enn þá merki. Þar er margt að sjá, litfögur hús, kastala frá 18. öld, kirkjubyggingar eða einfaldlega njóta heillandi fegurðar hafsins. Upplagt að rölta út í kvöldið og skoða sig um. Gist á hóteli í Collioure.
D2: Collioure – Banyuls
Í dag hefst gangan og leiðin liggur um ræktarlönd heimafólks. Framhjá Madeloc turninum sem upplagt er að ganga upp í og njóta útsýnisins áður en lækkunin niður til Banyuls hefst á milli hlaðinna veggja sem afmarka og skýla vínökrunum, þar sem sirah og aðrar grenache þrúgur þroskast. En það er fleira en þrúgur að finna í Banyuls og nágrenni, þorpið var heimili myndhöggvarans Maillol og mörg verka hans er að finna í þorpinu. Gist á hóteli í Banyuls:
Létta leiðin: 4 stunda ganga, hækkun 500m og lækkun 500m.
Lengri leiðin: 5 stunda ganga, hækkun 700m og lækkun 700m
D3: Banyuls – Cerbère
Við höldum áfram eftir krókaleiðum og kindagötum og drekkum í okkur mikilfenglegt útsýnið yfir sjálft Miðjarðarhafið. Við Querroig rústirnar, þar sem varðmenn stóðu vaktina á miðöldum er ágætt að staldra við áður en lengra er haldið. Leiðin liggur svo um heillandi og villt landslag, náttúruverndarsvæðisins sem kennt er við Cerbère, þorpið sem leynist við enda göngunnar og gæti verið á heimsenda. Gist á hóteli í Cerbére
Létta leiðin: 4 stunda ganga, hækkun 450m og lækkun 450m
Lengri leiðin: 5 stunda ganga, hækkun 700m og lækkun 700m
D4 : Cerbère – Llança
Dagleiðin í dag liggur nær sjónum, gróðurinn er lægri og ilmar á allt annan hátt. Án efa er hægt að staldra við á ströndinni í Garbet og jafnvel að dýfa sér í sjóinn sem alla jafna er spegilsléttur og heillandi enda umgjörðin stórkostleg bæði í litafegurð og landslagi. Leiðin liggur svo eftir ströndinni allt þar til við komum að höfninni í Llança. Gist á hóteli í Llança.
Ganga 4 stundir, hækkun 500m og lækkun 500m
D5: Llança – Port de la Selva
Í dag hækkum við okkur eftir ævafornum og fallegum klausturstíg að áhrifamikilli kirkju heilagrar Elenu og klaustri heilags föður af Roda sem er yfir þúsund ára gamalt og talið er að þar séu hýstar helgir dómar Péturs postula. Eftir að hafa skoðað okkur um í klaustrinu heldur leiðin áfram og nú lækkum við okkur aftur niður að strönd. Hallinn er þægilegur og útsýnið yfir Port de Selva flóann lætur engan ósnortinn. Gist á hóteli í Port de la Selva.
Létta leiðin: 4 stunda ganga, hækkun 550m og lækkun 550m.
Lengri leiðin: 5 stunda ganga, hækkun 700m og lækkun 700m.
D6: Port de la Selva – Cadaqués.
Leiðin í dag liggur um hrjóstrugt land Kross höfða (Cabo de Creus). Höfðinn er náttúrugarður og stígakerfi hans tiltölulega ungt, en flestir stígarnir sem við fetum voru opnaðir fyrir rúmlega 10 árum. áður en langt um líður erum við komin í land Salvador Dali, sem leiðir okkur beint að húsi þessa mikislvirta málara í Port Lligat og áfram að hinu heillandi fiskimannaþorpi Cadaqués. Gist á hóteli í Cadaqués.
Létta leiðin: 5 stunda ganga, hækun 500m og lækkun 500m.
Lengri leiðin: 7 stunda ganga, hækkun 500m og lækkun 500m.
D7: Cadaqués
Í dag tökum við því rólega og leiðum hugann að því sem undanfarnir dagar hafa borið í skauti sér. Sem þýðir þó ekki að við skoðum okkur ekki aðeins um í Cadaqués og nágrenni. Hægt er að kynna sér töfraeyjuna Oliguera og þær stórkostlegu klettamyndanir sem þar er að finna, sérílagi hinn þekkta klett, Cucurucuc, sem er tígulegur þar sem hann speglast í túrkisbláu vatni flóans. Gist á hóteli í Cadaqués.
Ganga 1:30, hækkun 100m og lækkun 100m.
D8: Cadaqués – Barcelona – Keflavík
tími til kominn að pakka saman og halda heim á leið. Fyrir þau sem vilja skoða safn Salvador Dali í borginni Figueres er best að taka daginn snemma fyrir eftirmiðdagsflug heim til Íslands.

Almennt:
Strandlengjan á milli Collioure og Cadaques hefur í gegnum tíðina lokkað til sín fólk af ólíku tagi, allt frá verðandi listamönnum til yfirstéttarkvenna Evrópu. Þar tóku listamenn eins og Matisse og Picasso út þroska og margur flóttamaðurinn gerði örstutt stopp í einhverju þorpanna áður en hann komst yfir landamærin frá Frakklandi til Spánar í Seinni Heimstyrjöldinni. Líti fólk lengra aftur í tímann má glöggt sjá merki um ítök Rómverja á svæðinu sem í dag tilheyrir Katalóníu. Katalónía teygir sig frá Spáni yfir Pýreneafjöllin til Frakklands og er sjálfstæð menningarheild sem stendur traustum fótum á milli þessara miklu menningarþjóða. Trúlega hefur það ekki síður verið menningin frekar en náttúrufegurðin sem laðaði fólk að svæðinu en blanda af hvoru tveggja getur ekki verið annað en ávísun á góða tíma.

Veður:
Enginn þarf að kvíða veðurfarinu þarna við vesturhluta Miðjarðarhafsins sem í sjálfu sér er áhrifavaldur á allt loftslag svæðisins. Vetur eru mildir og sumrin geta vissulega verið afar heit þó svo að nálægð sjávarins dragi úr hitanum svo hann verður aldrei óbærilegu. Þorp/byggðarlög á svæðinu guma af 300 sólskinsdögum að meðaltaliá ári svo fyllsta ástæða er til þess að vera með sólarvarnir til taks; sólgleraugu, sólhatta og að sjálfsögðu sólvarnarkrem!

Þjórfé og peningar:
Gjaldmiðillinn í Katalóníu, líkt og á Spáni og í Frakklandi er Evra. Auðvelt er að nálgast reiðufé í hraðbönkum ýmist með debet eða kreditkortum en ekki er hægt að reiða sig á að hægt sé að greiða með slíkum kortum ef verslað er við smærri kaupmenn eða handverksfólk á mörkuðum. Þjórfé er ávallt sjálfsagt að skilja eftir sé fólk ánægt með veitta þjónustu.

Vegabréf:
Ekki þarf vegabréfsáritun til Spánar eða Frakklands en nauðsynlegt er að vera með gilt vegabréf.

Farangur:
Merkja skal allar töskur vel og kanna eftir öll tengiflug hvort töskur séu enn á réttri leið (Transfer-desk flugvalla geta hjálpað við það).

Hertar reglur varðandi handfarangur:
Gott er að lesa bækling Flugmálastjórnar um hertar reglur varðandi handfarangur! Upplýsingar er að finna hér

Símasamband: Gsm símasamband er víðast hvar hægt að reiða sig á hvort heldur í sveit eða borg.

Internet: Í stærri borgum er internet víða aðgengilegt gegn vægu gjaldi.