- Einhver hrikalegasta öræfagangan á landinu meðfram vesturjaðri Vatnajökuls, stundum nefnd Bárðargata.

- Sjö daga bakpokaferð
Fjórði hluti göngunnar Frá strönd til strandar sem hefst í Ásbyrgi og lýkur í Vík í Mýrdal.

Einhver hrikalegasta öræfagangan á landinu meðfram vesturjaðri Vatnajökuls, stundum nefnd Bárðargata. Leiðin liggur um sanda, hraun, hamra og jökul. Vatnsföll eru mörg og sum hver ískyggileg, enda felst kúnstin í því að krækja fyrir þau á jökli. Leiðin liggur hátt og bera veður og aðrar aðstæður vitni um það sem gerir gönguna líka sérstaklega magnaða og eftirminnilega. Ein einagraðasta gönguleið landsins, óvíða er aðkoma erfiðari svo lítið svigrúm er til breytinga á ferðaáætlun.

Dagleiðir: 7-10 klst.
Heildar vegalengd: 115 km.
Hæð: 450-1000 m.y.s
Mesta hækkun: 300 m

Búnaðarlisti

Innifalið : Leiðsögn, matur í sjö daga (fyrir utan morgunmat fyrsta daginn og kvöldmat síðasta daginn), tjöld, tjaldstæðisgjöld, eldunar- og mataráhöld.
Hafa í huga : Eldgjá/Hólaskjól
Upphafsstaður : Nyidalur.

Dagur 1: Ferðin hefst í Nýjadal við Tungnafellsjökul og gengið upp Jökuldal hinn Nýja. Þegar líparítsvæði Vonarskarðs virðist innan seilingar er tjaldað í nágrenni við snotur hverasvæði. Tjald.

Dagur 2: Vonarskarð er fornt örnefni á þessum slóðum, þó ekki sé vitað hvort það hafi upprunalega verið haft yfir þetta skarð á milli Tungnafellsjökuls og Köldukvíslarjökuls. Skarðið er litskrúðugt með afbrigðum og vona ætti í lengstu lög að skyggni gefi færi á að sjá dýrðina. Gengið er suður skarðið að Köldukvíslarjökli og síðan áfram meðfram honum. Vaðið og reynt að finna snjóbrýr og jökulspangir yfir fyrstu kvíslarnar. Tjaldað við jökulsporðinn.

Dagur 3: Megnið af deginum fer í að ganga yfir sporð Köldukvíslarjökuls. Handan hans bíður áin Sveðja, einn af erfiðari farartálmum ferðarinnar, sem vaða þarf og getur reynst snúið síðla dags. Tjaldað í námunda við Bryðju, í dálítilli gígskál sem veitir gott skjól fyrir hugsanlegum sviptivindum af jökli. Tjald.

Dagur 4: Leiðin liggur með Hágönguhraunum og snotrum gígaröðum í Tröllahrauni niður að Tungnaárbotnum, síðan með Jökulgrindum og Tungnaárjökli að Jökulheimum, eina "byggða" bólinu í ferðinni. Langur dagur um eina hrjóstrugustu eyðimörk landsins. Skáli.

Dagur 5: Tungnaá er vaðin, sem útheimtir bæði sérstaka tækni og nokkurn tíma. Stefnan sett á milli jökuls og Grænafjallgarðs/Tungnaárfjalla. Allt í einu stöndum við frammi fyrir einni af óviðjafnanlegri perlu íslenskrar náttúru; Langasjó með Fögrufjöll/Skaftárfjöll sér að baki. Gengið er fyrir norðurenda vatnsins og síðan um enda fjallgarðsins að Útfalli sem þarf að vaða áður en tjaldað er í Grasveri. Tjald.

Dagur 6: Haldið suður Fögrufjöll með Langasjó. Ótal gígar og vötn gefa fjallgarðinum skemmtileg form og andstæður í litum halda augum við efnið. Í lok dags er gengið hjá Sveinstindi og haldið niður með Skaftá. Tjaldað er við Hvanngil, í grennd við Uxatinda og hina sérstöku Kamba handan árinnar. Tjald.

Dagur 7: Síðasti leggur ferðarinnar er um Uxatinda og á barmi Skaftárgljúfursins sunnan þeirra. Landslagið líkist æ meira völundarhúsi, gröfnu í þykk gjóskulög upprunnin úr Eldgjá þessari gríðarlegu gossprungu sem gengið er niður með síðasta hluta ferðarinnar í Lambaskarðshóla. Þar ætti að vera hægt að ná síðdegisrútunni sem fer á Klaustur, nú eða tjalda og halda upp á ferðarlok.