Andstæður skóga og öræfa

Ein flottasta leið Íslenskra Fjallaleiðsögumanna frá upphafi. Ferð sem sameinar ólíka þætti íslenskrar náttúru og býður upp á fjölbreytt gönguland og magnaða upplifun.

Dagleiðir: 6- 8 stundir.
Heildar gönguvegalengd: 60 kílómetrar.
Hæð: 200 -1100 metrar
Mesta hækkun: 550 metrar

Búnaðarlisti

Innifalið : Leiðsögn, matur í ferð, eldunar- og mataráhöld, öryggis- og jöklabúnaður, tjöld og akstur frá Skaftafelli í Núpsstaðarskóga.
Hafa í huga : Ferðin hefst og endar í Skaftafelli nauðsynlegt er að gera ráð fyrir einni nótt í Skaftafelli eða nágrenni nóttina fyrir ferð.
Upphafsstaður : Skaftafelli

Dagur 1: Mæting er við bækistöð Íslenskra Fjallaleiðsögumanna í Skaftafelli kl. 08:00. Ekið frá Skaftafelli í Núpsstaðarskóga þar sem gangan hefst þegar fólk hefur notið skóganna og kynjamynda við Tvílitahyl eftir því sem hugur stendur til.  Gengið er meðfram stórkostlegum gljúfrum Núpsár sem víða eru yfir 100 metra djúp. Tjaldað rétt ofan við Skessutorfugljúfrin (efsta hluti Núpsárgljúfra) þar sem fálki og refir ráða ríkjum.

Dagur 2: Í dag er gengið um heiðalöndin alla leið inn undir jökul, fyrir enda Grænalóns og tjaldað austarlega í Grænafjalli á gömlum vatnahjalla þaðan sem gott útsýni er yfir Skeiðarárjökul og Grænalón. Ef tími vinnst til og aðstæður leyfa er farið í skoðunarferð að ölkeldunum í Taumagili.

Dagur 3: Við leggjum á Skeiðarárjökulinn í dag og kynnumst heillandi landslagi þessa víðáttumesta skriðjökuls landsins.  Um er að ræða ríflega 15 km göngu á tiltölulega flötum ís, þar sem einu kennileitin eru sanddrýli og garðar. Þegar komið er aftur á fast land í Norðurdal í Skaftafellsfjöllum, bíður tilkomumikill náttstaður milli jökuls og snarbrattra tinda, að mati margra einn sá flottasti í heimi. 

Dagur 4: Á þessum síðasta degi ferðarinnar er gengið yfir Skaftafellsfjöllin um líparítgular Kjósareggjarnar, þar sem útsýnið gerir öll orð máttvana. Haldið er ofan Vesturdal niður í Bæjarstaðarskóg og þaðan yfir Morsárdal og Skaftafellsheiðina. Ferðalok í Skaftafelli undir kvöld.

Mikilfengleg bakpokaferð frá skógarkjarri og kynjamyndum Núpsstaðarskóga yfir í tröllsleg fjöll í baklandi þjóðgarðsins í Skaftafelli. Gengið er upp með Núpsárgljúfrum upp að Grænalóni, aðþrengdu jökulstífluðu vatni milli Eggja og Grænafjalls. Ein mesta íselfur landsins, Skeiðarárjökull, er þveruð á einum degi og í dagslok er gist á einhverjum stórkostlegasta tjaldstað sem fyrir finnst. Þessi ferð býður upp á ólíka þætti íslensks náttúrufars og skilur eftir upplifanir sem endast.