Ganga um ósnortin öræfi við jaðar Vatnajökuls á slóðum hreindýra og heiðafugla

- Þægileg bakpokaferð við jaðar Vatnajökuls

Svæðið norðan og austan við Vatnajökul er kjörið gönguland og sameinar heillandi náttúrufegurð öræfakyrrðarinnar. Hér er á ferð heillandi ganga um fáfarnar slóðir við jaðar Vatnajökuls þar sem auðvelt er að láta öræfakyrrð og ótrúlegt náttúrufar hefja sig í æðra veldi. Gengið er um gróið land og stórgrýtisurðir þar sem hægt er að njóta fossafalla, fjallavatna, smáblóma og jafnvel hreindýra. Allar nætur er gist í skálum þar sem aðstaða er með því besta á hálendinu, engin þörf á því að bera með sér svefnpoka!

Dagleiðir: 6-8 klst
Heildar vegalengd: 50 kílómetrar
Gönguhæð: 100 - 800 m.y.s
Mesta hækkun: 250 m

Búnaðarlisti

Innifalið : Flug Reykjavík - Egilsstaðir, og Hornafjörður - Reykjavík, leiðsögn, matur í gönguferðinni (fyrir utan morgunmat fyrsta daginn og kvöldmat síðasta daginn), akstur frá Egilsstöðum suður á Eyjabakka og frá göngubrú til Hafnar í Hornafirði.
Hafa í huga : Hægt er að kaupa ferðina án flugs og hefst hún þá á Egilsstöðum og endar á Hornafirði. Verð lækkar til samræmis í 82.900 krónur
Upphafsstaður : Reykjavíkurflugvöllur

Dagur 1: Ekið frá Egilsstöðum upp á Eyjabakka þar sem við reimum skóna og öxlum pokana. Gengið um hina raunverulegu Eyjabakka austan Jökulsár í Fljótsdal með útsýni á Snæfellið sem gnæfir tígulegt  í vestri. Skömmu innan við Bergkvíslakofa sveigjum við til austurs og tökum stefnuna á Geldingafellið. Gist í skála norðan undir Geldingafelli.
 
Dagur 2: Við göngum á Geldingafellið og höldum svo fram á brúnir Vesturdals þar sem Jökulsá í Lóni á upptök sín og svo meðfram þeim til suðausturs að Kollumúlavatni. Göngulandið í dag er talsvert frábrugðið deginum í gær og andstæðurnar skemmtilegar. Gist í skálanum Egilsseli við Kollumúlavatn.
 
Dagur 3: Deginum í dag verjum við í nágrenni Egilssels. Við göngum niður í Víðidal og hugleiðum hvernig búseta á þessum afskekkta stað gæti hafa verið á rústum bæjarhlaðsins þar sem búið var fram á fyrstu ár 20. aldarinnar. Upplagt að koma við á Kollumúlakollinum á heimleiðinni. Gist í skálanum Egilsseli við Kollumúlavatn.
 
Dagur 4: Í dag liggur leiðin niður í Múlaskála. Við yfirgefum ró og næði heiðavatnsins og höldum yfir að Tröllakrókahnaus og svo um Tröllakrókana niður í Leiðartungur. Hérna ber landslagið nafn með rentu og gott að komast úr tröllslegum heimunum niður í kjarrivaxnar Leiðartungurnar. Litadýrðin sem við blasir af brúnunum er óviðjafnanleg og eykst og eflist eftir því sem við lækkum okkur. Gist í Múlaskála í Nesi.
 
Dagur 5: Við höldum um Kamba suður í Eskifell og njótum hrikalegs landslagsins í Jökulsárgljúfrunum, þar sem engum nema fuglinum fljúgandi sýnist fært. Hnappadalstindur og Jökulgilstindar blasa við handan ár. Við Eskifell er göngubrú á Jökulsá og við höldum yfir á austurbakkann við göngubrúnna þar sem gönguferðin endar. Bíll flytur okkur til Hafnar í Hornafirði þaðan sem hægt er að fljúga til Reykjavíkur.