- Sannkölluð áskorun til hins áhugasama bakpokaferðalangs - ganga þvert yfir hálendi Íslands.

-Þrjátíu eins dags bakpokaferð Ásbyrgi - Vík í Mýrdal

Sannkölluð áskorun til hins áhugasama bakpokaferðalangs - ganga þvert yfir hálendi Íslands. Lagt er upp frá norðurströndinni í Ásbyrgi og gosbelti Norður- Atlantshafshryggjarins fylgt suður til sendinnar strandarinnar við Vík í Mýrdal. Þetta er fjölbreytt ferðlag þar sem andstæður elds og íss, auðnar og gróðurs takast á. Þjóðsögur og munnmæli um útilegumenn og afturgöngur, flögð og forynjur; sveipa þessar heillandi slóðir ævintýraljóma og óhætt að segja að um einstaka upplifun sé að ræða fyrir þá sem takast á við þrekvirki sem þetta. Lengd ferðarinnar ein og sér gerir hana ósamanburðarhæfa við annað sem fólk er almennt að fást við. Lengdin gerir það einnig að verkum að næsta öruggt er að allar tegundir veðurs verða til staðar og jafnvel hægt að upplifa árstíðabreytingar í ferðinni. Á hinn bóginn er ekkert sem mælir gegn því að taka ferðina í áföngum, einn legg í einu. 

Dagleiðir: 6-10 klst
Heildar vegalengd: 450 kílómetrar
Hæð: 0-1200 m.y.s.
Mesta hækkun: 600 m

Búnaðarlisti

Innifalið : Leiðsögn, tjöld, allur matur í gönguferðinni, eldunaráhöld, öryggis- og jöklabúnaður, svefnpokapláss í skálum skv. ferðaplani.
Hafa í huga : Ferðin endar á Vík.
Upphafsstaður : Ásbyrgi

Dagur 1: Gengið í þjóðgarðinum frá Ásbyrgi upp til Hljóðakletta og Vesturdals. Tjald.

Dagur 2: Áfram upp með Jökulsárgljúfrum að Dettifossi. Tjald.

Dagur 3: Yfir grýttar hæðir og grænar heiðar að Eilífsvötnum. Tjald.

Dagur 4: Gengið um eldstöðvarnar frá Mývatnseldum síðari; Kröflu og Leirhnúk, til Reykjahlíðar við Mývatn. Tjald.

Dagur 5: Hvíldardagur á Mývatni. Tjald.

Dagur 6: Frá Mývatni um Hverfjall og Lúdentsborgir að Selhjallagili. Tjald.

Dagur 7: Með Selfjalli um hraun og sanda að hinum gænu Sellöndum og Kráká. Tjald.

Dagur 8: Áfram haldið í Suðurárbotna þar sem óhemjumagn af kristaltæru lindavatni kemur undan víðáttumiklu Ódáðahrauninu. Skáli.

Dagur 9: Úr Suðurárbotnum er gengið upp Dyngjufjalladal; landslagið verður æ hrjóstrugra og ógreiðfært. Skáli.

Dagur 10: Úr hlíðum Dyngjufjalla er farið um Jónsskarð inn í Öskju, hið vel falda hringleikahús náttúruaflanna og áfram í Drekagil þar sem ferðin endar.

Dagur 11: Hvíladardagur í Öskju. Skáli.

Dagur 12: Lagt af stað eftir hádegið. Gengið inn í svarta sandbreiðuna norðan Öskju. Áfangastaður þessa fyrsta dags er gróðurvinin við Svartá, sem kemur á óvart mitt inni í sandöldunum. Tjald.

Dagur 13: Eftir að fyllt hefur verið á vatnsflöskurnar er lagt af stað yfir sandinn, nú með Dyngjujökul á vinstri hönd og Öskju á þá hægri. Hér minnir útsýnið um margt á Mordor Tolkíens. Eftir dagleið um þessa sandauð í víðáttunni norðan Vatnajökuls er komið að hæð þar sem jökulá rennur hjá. Hér er tjaldað við eina vatnið sem býðst um óraveg. Tjald.

Dagur 14: Nú gerist landið ósléttara og meira á fótinn. Gengið er þvert yfir litla hraunbreiðu og upp á Urðarhálsinn, ævafront eldfjall sem enn í dag geymir einn af dýpstu gígum Íslands. Ekki langt frá Vatnajökli komum við svo að neyðarskýlinu við Kistufell þar sem gist er um nóttina. Tjald.

Dagur 15: Eins og dagana á undan liggur leiðin um auðnir og víðáttu. Ekki stingandi strá að sjá í svörtum sandinum. Vaða þarf einstöku jökulá og gamalli gígaröð fylgt í Gæsavötn. Hér er gist í skála og hægt að drekka í sgi litadýrð gróðurs og angan eftir langan dag í svörtum sandi. Skáli.

Dagur 16: Stuttu eftir að lagt er upp frá Gæsavötnum er komið að mikilli jökulá. Það fer eftir aðstæðum hvort áin er vaðin eða gengið að upptökum hennar og farið yfir jökul. Stefnan er tekin á Vonarskarð þar sem tjöldum er slegið upp að kveldi dags. Tjald.

Dagur 17: Farið er um bratt fjallaskarð yfir í Snapadal, þar sem finna má heitar laugar. Hér gefur að líta magnaðan litasymfon marglitra líparítfjallanna sannkallað augnayndi eftir einsleitni grárra basaltfjallanna. Áfram haldið um fjallaskörð og hryggi niður í Jökuldal og við enda hans komið að tjaldstæðinu og skálanum í Nýjadal. Skáli.

Dagur 18: Hvíldardagur í Nýjadal. Skáli.

Dagur 19: Snúið frá Nýjadal og gengið upp Jökuldal hinn Nýja. Þegar líparítsvæði Vonarskarðs virðist innan seilingar er tjaldað í nágrenni við snotur hverasvæði. Tjald.

Dagur 20: Vonarskarð er fornt örnefni á þessum slóðum, þó ekki sé vitað hvort það hafi upprunalega verið haft yfir þetta skarð á milli Tungnafellsjökuls og Köldukvíslarjökuls. Skarðið er litskrúðugt með afbrigðum og vona ætti í lengstu lög að skyggni gefi færi á að sjá dýrðina. Gengið er suður skarðið að Köldukvíslarjökli og síðan áfram meðfram honum. Vaðið og reynt að finna snjóbrýr og jökulspangir yfir fyrstu kvíslarnar. Tjaldað við jökulsporðinn.

Dagur 21: Megnið af deginum fer í að ganga yfir sporð Köldukvíslarjökuls. Handan hans bíður áin Sveðja, einn af erfiðari farartálmum ferðarinnar, sem vaða þarf og getur reynst snúið síðla dags. Tjaldað í námunda við Bryðju, í dálítilli gígskál sem veitir gott skjól fyrir hugsanlegum sviptivindum af jökli. Tjald.

Dagur 22: Leiðin liggur með Hágönguhraunum og snotrum gígaröðum í Tröllahrauni niður að Tungnaárbotnum, síðan með Jökulgrindum og Tungnaárjökli að Jökulheimum, eina "byggða" bólinu í ferðinni. Langur dagur um eina hrjóstrugustu eyðimörk landsins. Skáli.

Dagur 23: Tungnaá er vaðin, sem útheimtir bæði sérstaka tækni og nokkurn tíma. Stefnan sett á milli jökuls og Grænafjallgarðs/Tungnaárfjalla. Allt í einu stöndum við frammi fyrir einni af óviðjafnanlegri perlu íslenskrar náttúru; Langasjó með Fögrufjöll/Skaftárfjöll sér að baki. Gengið er fyrir norðurenda vatnsins og síðan um enda fjallgarðsins að Útfalli sem þarf að vaða áður en tjaldað er í Grasveri. Tjald.

Dagur 24: Haldið suður Fögrufjöll með Langasjó. Ótal gígar og vötn gefa fjallgarðinum skemmtileg form og andstæður í litum halda augum við efnið. Í lok dags er gengið hjá Sveinstindi og haldið niður með Skaftá. Tjaldað er við Hvanngil, í grennd við Uxatinda og hina sérstöku Kamba handan árinnar. Tjald.

Dagur 25: Ferðin í dag er um Uxatinda og á barmi Skaftárgljúfursins sunnan þeirra. Landslagið líkist æ meira völundarhúsi, gröfnu í þykk gjóskulög upprunnin úr Eldgjá þessari gríðarlegu gossprungu sem gengið er niður með í Lambaskarðshóla/Hólaskjól. Skáli.

Dagur 26: Hvíldardagur í Hólaskjóli. Skáli.

Dagur 27: Frá Hólaskjóli er gengið um grænar heiðar sem skornar eru af vatnsrofi og stöku opum í gossprungu Eldgjárinnar sem liggur eins og bendill í áttina að upphafspunkti sínum: eldtöðinni Kötlu undir Mýrdalsjökli. Tjaldað er við Svartafellstanga eða Rauðabotn sem er einn af stærri gígum gossprungunnar. Tjald.

Dagur 28: Haldið er fram hjá Brytalækjum í áttina að Öldufelli í jaðri Mýrdalsjökuls. Gengið inn að lindum sem spretta upp í jaðri Öldufellsins og heim að Öldufellsjökli og síðan áfram á sléttum jöklinum yfir að útfalli Jökulkvíslar, vatnsmikillar jökulár sem rennur í Hólmsá. Tjaldað við Jökulgil og farið í fossakönnunarferð í giljunum hjá Austastahrygg. Tjald.

Dagur 29: Dagurinn hefst á því að vaða kvíslina sem kemur úr Vondugiljum en síðan liggur leiðin yfir sporð Sandfellsjökuls. Þegar komið er niður af jöklinum er vaðið yfir tvær jökulkvíslar og gengið upp á sléttuna ofan Sandfells. Máttur jökulsins verður mönnum augljós þegar haldið er áfram með brún Mýrdalsjökuls. Berlega sérst hve mikið jökullinn hefur hopað á síðustu árum. Eftir standa jökulgarðar, stórgrýti og aðrar jökulmenjar. Í lok dags er áð við jaðar Höfðabrekkujökulsins. Tjald.

Dagur 30: Fyrri hluti dagsins fer í göngu yfir Höfðabrekkujökul. Jökullinn er að mestu leyti sléttur en þó þarf að krækja fyrir nokkur sprungusvæði. Upp úr vestanverðum jöklinum stendur jökulskerið Huldufjöll, meðfram því eru tignarlegir brattir og úfnir skriðjöklar. Landtakan af jöklinum er nokkuð á fótinn og skilar okkur upp á stórbrotinn útsýnistað ofarlega á Höfðabrekkuafrétt. Farið er niður með Þakgili sem í raun bæri gljúfur nafn með rentu, svo stórbrotið sem það er. Um leið og færi gefst er gengið niður í gilið og tjaldað þar. Tjald.

Dagur 31: Lokadag ferðarinnar er haldið yfir Höfðabrekkuheiði, vaðið yfir Heiðargils- og Sandá við ármótin og farið upp á Arnarstaksheiði þaðan sem gott útsýni er yfir Heiðarvatn. Þegar komið er fram á fjallgarðinn blasa við kunnugleg kennileiti;  Reynisdrangar, Vík og Reynisfjall. Komið er niður á tjaldstæðið þar sem ferðinni lýkur.

Athugið: Vegna lengdar slíkrar ferðar þarf að gera ráð fyrir og skipuleggja fyrirfram, útskipti á fatnaði og öðrum persónulegum munum (hugsanlega skóm). Þetta færi með í vistasendingum okkar. Allur leiðangurinn tekur um mánuð (31 dag) með ferðum og tilheyrandi.