- Móbergsfjöllin í jaðri Mýrdalsjökuls eiga sér varla hliðstæðu í íslenskri náttúru. Jafnvel kunnar perlur eins og Þórsmörk standast vart samanburð við þetta lítt þekkta, iðagræna móbergslandslag.

-Fimm daga bakpokaferð
 Fimmti og síðasti hluti göngunnar Frá strönd til strandar sem hefst í Ásbyrgi og lýkur í Vík í Mýrdal.

Móbergsfjöllin í jaðri Mýrdalsjökuls eiga sér varla hliðstæðu í íslenskri náttúru. Jafnvel kunnar perlur eins og Þórsmörk standast vart samanburð við þetta lítt þekkta, iðagræna móbergslandslag. Suðurhluta Eldgjár er fylgt alla leið að Mýrdalsjökli. Frá hinu mikilúðlega Öldufelli er jaðri Mýrdalsjökuls fylgt að Austastahrygg og Ólafshaus, lítt þekktu fjallasvæði í faðmi jökulsins sundurskornu af gullfallegum giljum og gljúfrum. Farið er á jökli fyrir stærstu jökulárnar yfir að Sandfelli, en lengsti leggurinn á jökli er sjálfur Höfðabrekkujökullinn, um 7 km breiður. Landgangan af jökli er í mögnuðum fjallasal þar sem brattir skriðjöklar steypa sér niður af hájöklinum og renna á milli Skers og Huldufjalla sem teygja toppa sína upp úr jökulísnum.Gengið um Þakgil, Höfðabrekkuheiði og Kerlingardal, og endað á sendinni strönd Víkur.

Dagleiðir: 6-9 klst.
Heildar vegalengd: 76 kílómetrar
Hæð: 50-600 m.y.s.
Mesta hækkun: 300 m

Búnaðarlisti

Innifalið : Leiðsögn, matur í fimm daga (fyrir utan morgunmat fyrsta daginn og kvöldmat síðasta daginn), tjöld, eldunar- og mataráhöld.
Hafa í huga : Ferðin endar í Vík í Mýrdal.
Upphafsstaður : Eldgjá/Hólaskjól.

Dagur 1: Ferðn hefst við Lambaskarðshóla (Hólaskjóli). Frá Hólaskjóli er gengið um grænar heiðar sem skornar eru af vatnsrofi og stöku opum í gossprungu Eldgjárinnar sem liggur eins og bendill í áttina að upphafspunkti sínum: eldtöðinni Kötlu undir Mýrdalsjökli. Tjaldað er við Svartafellstanga eða Rauðabotn sem er einn af stærri gígum gossprungunnar. Tjald.

Dagur 2: Haldið er fram hjá Brytalækjum í áttina að Öldufelli í jaðri Mýrdalsjökuls. Gengið inn að lindum sem spretta upp í jaðri Öldufellsins og heim að Öldufellsjökli og síðan áfram á sléttum jöklinum yfir að útfalli Jökulkvíslar, vatnsmikillar jökulár sem rennur í Hólmsá. Tjaldað við Jökulgil og farið í fossakönnunarferð í giljunum hjá Austastahrygg. Tjald.

Dagur 3: Dagurinn hefst á því að vaða kvíslina sem kemur úr Vondugiljum en síðan liggur leiðin yfir sporð Sandfellsjökuls. Þegar komið er niður af jöklinum er vaðið yfir tvær jökulkvíslar og gengið upp á sléttuna ofan Sandfells. Máttur jökulsins verður mönnum augljós þegar haldið er áfram með brún Mýrdalsjökuls. Berlega sérst hve mikið jökullinn hefur hopað á síðustu árum. Eftir standa jökulgarðar, stórgrýti og aðrar jökulmenjar. Í lok dags er áð við jaðar Höfðabrekkujökulsins. Tjald.

Dagur 4: Fyrri hluti dagsins fer í göngu yfir Höfðabrekkujökul. Jökullinn er að mestu leyti sléttur en þó þarf að krækja fyrir nokkur sprungusvæði. Upp úr vestanverðum jöklinum stendur jökulskerið Huldufjöll, meðfram því eru tignarlegir brattir og úfnir skriðjöklar. Landtakan af jöklinum er nokkuð á fótinn og skilar okkur upp á stórbrotinn útsýnistað ofarlega á Höfðabrekkuafrétt. Farið er niður með Þakgili sem í raun bæri gljúfur nafn með rentu, svo stórbrotið sem það er. Um leið og færi gefst er gengið niður í gilið og tjaldað þar. Tjald.

Dagur 5: Lokadag ferðarinnar er haldið yfir Höfðabrekkuheiði, vaðið yfir Heiðargils- og Sandá við ármótin og farið upp á Arnarstaksheiði þaðan sem gott útsýni er yfir Heiðarvatn. Þegar komið er fram á fjallgarðinn blasa við kunnugleg kennileiti;  Reynisdrangar, Vík og Reynisfjall. Komið er niður á tjaldstæðið þar sem ferðinni lýkur.