Í samstarfi við Hótel Skaftafell bjóða Íslenskir fjallaleiðsögumenn upp á sérstakt verð á vinsælustu fjallgöngu okkar. Hvannadalshnjúk ur með gistingu og kvöldverði.

Hvannadalshnjúkur og hótelgisting í Skaftafelli

Gönguferð á hæsta tind landsins. Hvannadalshnjúkur er fremur auðveldur tæknilega en tekur drjúgt af úthaldinu. Ferð á Hvannadalshnúk er ógleymanleg upplifun og allmargir fara ár hvert.

Lagt er af stað snemma morguns, oftast um 5 og því er heppilegast að gista í Skaftafelli eða nágrenni. Dagleiðin er löng og ströng og því ekki mælt með því að aka langar leiðir að göngu lokinni. Því er kjörið að gista á Hótel Skaftafelli í Freysnesi, bæði fyrir og eftir gönguna og endurhlaða orkubirgðirnar á veitingastað hótelsins. Kynntu þér einstakt tilboð. Hvannadalshnjúkur, gisting og matur!

Flokkun: Krefjandi, meira en 2000 m hækkun og ~25 km dagleið.
Áætlaður tími: 10-15 klst ganga
Fjöldi: Tveir til átta þátttakendur með hverjum leiðsögumanni. 

Til þess að bóka þessa Hvannadalshnjúk með gistingu hafið þá samband við skrifstofu í fjallaleidsogumenn@fjallaleidsogumenn.is eða í síma 587-9999.

Bókunarskilmálar - Búnaðarlisti

Lágmarksaldur : 16 yrs.
Innifalið : Allur sérhæfður útbúnaður til jöklaferða. Gisting í tvær nætur á Hótel Skaftafelli, ein nótt fyrir göngu og ein eftir göngu, tveir morgunverðir og þriggja rétta kvöldverður að göngu lokinni. Verðið miðast við að gist sé í tveggja manna herbergjum.
Ekki innifalið : Ferðir í og frá Öræfum, nesti, persónulegur búnaður
Hafa í huga : Tilboðið miðast við tvo sem bóka saman og gista í tveggja manna herbergjum.
Lengd : 10-15 klst. ganga
Upphafsstaður : Bækistöð Íslenskra fjallaleiðsögumanna við þjónustumiðstöð Þjóðgarðsins í Skaftafelli.

Hvannadalshnjúkur eftir Sandfellsleið

Ferðatilhögun er alla jafna á þá leið að lagt er af stað frá Sandfelli kl 05.00 og áð á fyrstu brekkubrún í uþb 300 m hæð við læk þar sem hægt er að fylla á brúsa fyrir daginn og fá sér ærlega að drekka áður en haldið er áfram upp á heiðarbrúnina í 700 m hæð. Þar er aftur áð eftir að mesti brattinn er að baki og svo haldið um aflíðandi mela Sandfellsheiðarinnar að jökulrönd. Mikil áhersla er lögð á það að fara rólega upp þessar brekkur enda engin ástæða til þess að láta ofurkapp í upphafi eyðileggja seinni hluta göngunnar!

Við jökulrönd er almennileg nestispása enda alla jafna kominn hefðbundinn morgunverðartími, auk þess sem allir fara í belti og línur fyrir gönguna á jöklinum. Eftir að jöklagangan hefst er að jafnaði stoppað á klukkustundar fresti áður en komið er upp á öskjubrúnina í rúmlega 1800 m hæð. Áð er á brúninni og snætt áður en gangan yfir sjálfa öskjuna tekur við sem gæti tekið uþb klukkustund. Undir sjálfum Hvannadalshnjúki er aftur áð fyrir lokaáfangann og að sjálfsögðu er stoppað á toppnum eftir því sem hugur stendur til og veður leyfir. Af toppnum er mikilfengilegt útsýni yfir stóran hluta Íslands, víðerni Vatnajökulsins, Skaftafellsfjöllin og Skeiðarársand. Sama leið er gengin til byggða.

Nauðsynlegt er að stoppa í bækistöð Íslenskra Fjallaleiðsögumanna í Skaftafelli kvöldið fyrir gönguna, fá afhentan nauðsynlegan jöklabúnað og fara yfir ferðatilhögun. Svo að allir fái nægan svefn er gott að miða við það að vera komin austur í Skaftafell ekki seinna en 20.00 – 21.00 kvöldið fyrir gönguna. Ekki má horfa framhjá mikilvægi góðrar næturhvíldar fyrir göngu sem þessa.