Kæra göngufólk!
Þá er það fyrsta gangan okkar í „Toppaðu með 66°NORÐUR og Íslenskum Fjallaleiðsögumönnum". Miðvikudaginn 15. febrúar liggja leiðir okkar um forvitnilegt svæði í nágrenni höfuðborgarinnar, um Búrfellsgjá og Búrfell.
Búrfellsgjáin er hrauntröð sem myndaðist í gríðarmiklu eldgosi fyrir um það bil 7200 árum úr Búrfellinu. Svæði þetta er á náttúruminjaskrá enda telst gjáin ein sérstæðasta hrauntröð landsins. Búrfellið er eldstöð af þeirri gerð sem kallast eldborg en þær einkennast af því að gos hefur átt sér stað á stuttri sprungu og myndað stakan aðalgíg. Búrfellsgígurinn stendur einn og stakur, 180 m hátt yfir sjó, hlaðinn úr gjalli og hraunkleprum.
Gangan er þægileg og við gerum ráð fyrir 2-4 klst göngu.
ALLIR VELKOMNIR ÞÓ AÐ SKRÁNING SÉ EKKI FRÁGENGIN
Brottför:
Kl. 17:30 frá verslun 66°NORÐUR í Faxafeni 12, stundvíslega. Gott er að sameinast í bíla eins og hægt er. Æskilegt er að farþegar skipti á milli sín eldsneytiskostnaði.
Gangan hefst við bílastæði undir Vífilsstaðahlíð (kl. 18.00). Þeir sem vilja geta komið beint á bílstæðið. Til að komast að bílastæðinu er hægt að fylgja þessum leiðbeiningunum og skoða kortið:
Við keyrum Reykjanesbrautina og beygjum inn Vífilsstaðaveginn hjá Vífilsstöðum og svo til hægri inná Heiðmerkuveg (895) að bílastæði. Leiðsögumenn taka á móti ykkur í sjálflýsandi gulum vestum.
GPS hnit á bílastæði: N64 03.653 W21 52.465
Veðurspá: (uppfært 8:30, þriðjudaginn 14.2.12, af vef veðurstofunnar)
Á miðvikudag:
Suðvestan- og vestan 10 m/s og rigning eða slydda. Hiti 1 til 5 stig, en frystir víða um kvöldið.
Útbúnaður:
Hlýr og skjólgóður fatnaður, vettlingar og húfa, góðir gönguskór, legghlífar og vasaljós eða ennisljós. Girnilegt nesti og heitur drykkur á brúsa er eðal. Gott er að hugsa vel um orkuforðann fyrir gönguna og borða vel í hádeginu og kaffinu á göngudegi.
Frekari upplýsingar um Toppaðu með 66°Norður og Íslenskum Fjallaleiðsögumönnum má finna hér.
Skráningarsíða Toppaðu með 66°Norður og Íslenskum Fjallaleiðsögumönnum
Facebook síða Toppaðu með 66°Norður og Íslenskum Fjallaleiðsögumönnum.
Hlökkum til að sjá ykkur.
