Umhverfisstefna ÍFLM

Íslenskir Fjallaleiðsögumenn leggja áherslu á góða umgengni um viðkvæma náttúru landsins. Markmiðið er að öll ferðamennska á vegum fyrirtækisins sé sjálfbær, hópar á vegum þess skilji engin varanleg spor eftir sig. Næstu ferðalangar eiga ekki að sjá að þar hafi aðrir verið á ferð. Þess vegna forðumst við ofsetin ferðamannasvæði eins og kostur er og beitum okkur í umræðu um ferðaþjónustu og náttúruvernd.

Íslenskir Fjallaleiðsögumenn vilja vernda hálendi Íslands gegn frekari stórframkvæmdum svo sem virkjunum, raflínum og uppbyggðum vegum. Eins viljum við að tekið verði til hendinni þar sem ástand hálendisins og annarra náttúruperla landsins er óviðunandi vegna ágangs, allt í því skyni að komandi kynslóðir geti notið þessa á sama hátt og við höfum getað hingað til. Til þess að slíkt verði framkvæmanlegt þarf (alvöru) skipulag að koma á undan framkvæmdum.

Íslenskir Fjallaleiðsögumenn fylgja umhverfismarkmiðum World Wildlife Fund fyrir ferðaþjónustu á heimskautasvæðum og hafa tekið þátt í samnorrænu umhverfissamstarfi FINECO varðandi sjálfbæra umgengni við náttúruna.

Árið 2009 unnu Íslenskir Fjallaleiðsögumenn Umhverfisverðlaun Ferðamálastofu Íslands.