Grunnatriði í fjallamennsku að vetrarlagi 

Markmið: 
Markmið námskeiðisins er að nemendur læri grunnatriði fjallamennsku og klifurs að vetrarlagi. Að loknu námskeiðinu eiga þátttakendur að vera færir um að fara í og skipuleggja stuttar ferðir til að byggja upp eigin reynslu. Enn fremur eiga þeir að geta tekist á við auðvelt snjóklifur af öryggi. Nemendum er þó nauðsynlegt að kynna sér notkun korta og nútíma leiðsögutækja áður en haldið er í slíkar ferðir. Námskeiðið hentar öllum þeim sem hafa áhuga á vetrarferðamennsku
 
Hvenær:Bóklegt 8. febrúar, verklegt 11. og 12. febrúar 2012

Kröfur: 
Ekki er gerð krafa um önnur námskeið. Þátttakendur verða að vera í góðu líkamlegu og andlegu formi og þeir verða að mæta á verklegan hluta námskeiðisins í viðeigandi fatnaði og með viðeigandi viðlegubúnað til vetrarferða, sjá útbúnaðarlista sem verður útdeilt til þátttakenda.

ATH: Netklúbbsverð og verð til félaga í Íslenska Alpaklúbbnum er 34.500 kr, vinsamlegast hafið samband við Ívar Finnbogason

Innifalið : 1 leiðbeinandi á hverja 6 þátttakendur, sameiginlegur fjallabúnaður og búnaður þáttakenda, námsgögn
Ekki innifalið : Akstur á vettvang
Hafa í huga : Ítarlegur útbúanaðarlisti verður afhentur við upphaf námskeiðsins. Kennari áskilur sér rétt til að hafna notkunn búnaðar í eigu þátttakenda.

Kvöld 8. febrúar 2012: -Farið verður yfir helstu hnúta: áttuhnútur, pelastikk, hestahnútur, fiskimannahnútur, hálfbragð og slinghnútur eru hnútar sem allt vetrarferðafólk ætti að þekkja. Rætt verður um viðeigandi notkun hnútanna og farið stuttlega í ferli klifurs og skipanir. Helsti búnaður er kynntur og farið ítarlega í viðeigandi klæðnað í vetrarferðum. Gengið frá ferðatilhögun fyrir helgina.

Dagur 1 11. febrúar 2012: -Fjallganga, gengið er að einum af skálum ÍSALP, annað hvort í Tindfjöllum eða Botnssúlum. Á leiðinni er farið í eftirfarandi atriði: notkun ísaxar; að höggva spor; þrjár mismunandi aðferðir við að beita öxi í klifri; ísaxarbremsu úr mismunandi stöðum; skjól; að tjalda í snjó og gerð snjóhúsa; göngutækni; hvernig er best að ganga á broddum; troða spor; hækkun á ská / hækkun beint. Í dagslok er haldið til skála og við tekur matseld og annað tilheyrandi. Kvöldinu varið í umræður. Þeir sem vilja geta sofið í snjóhúsi.

Dagur 2 12. febrúar 2012: -  Notkun snjóflóðaýlis og stanga, leiðarval með tilliti til snjóflóðahættu og snjótryggingar. Mismunandi snjóakkeri: grafin exi og frosinn vettlingur. Sitjandi tryggingar, snjó- og íspollar. Helstu ístryggingar, spektra ísskrúfur, v-þræðingar. Farið verður í nokkrar mismunandi aðferðir við sig með karabínu, ísöxi, túbu og áttu sem og sig án alls. Þá er lítillega rætt um ferðamennsku á jöklum og aðferðir til að ná félaga úr sprungu.

Brottfarardagur	Laust ?