Trússferð gegnum eitt fallegasta eldfjallasvæði veraldar

Hápunktar

Verð frá132.000 kr.

Sæluferð um eitt magnaðasta gossvæði Íslands - Eldhraun og Lakagíga

Árið 1783 hófst í Lakagígum eitt stærsta gos Íslandssögunnar, Skaftáreldar. Skaftáreldar stóðu í hálft ár og gosmagnið sem úr iðrum jarðar kom er eitt hið mesta úr einu gosi, ekki aðeins á Íslandi heldur á heimsvísu. Hraunið sem rann í Skaftáreldum, Eldhraun, þekur 565 ferkílómetra og teygir sig niður af Síðuafréttinum austan og vestan við hina raunverulegu Síðu. Þó gosið og eftirstöðvar þess hafi á sínum tíma verið stórkostlegar náttúruhamfarir sem settu allt daglegt líf úr skorðum og ollu umtalsverðum hörmungum á landinu er fátt sem bendir til þeirrar staðreyndar þegar ferðalangur stendur á tindi Laka og horfir yfir gígaröðina og hraunbreiðuna. Þetta er trúlega einn af mögnuðustu útsýnisstöðum Íslands og upplifunin er margslungin þegar hrópandi andstæður landslagsins blasa við. Í þeim er bæði mýkt og harka, mosi og auðn.
Þó undarlegt megi virðast eru þetta ekki fjölfarnar slóðir og því umlykur öræfakyrrðin okkur á þessum magnþrungna stað. Hérna gefst kjörið tækifæri til þess að njóta öræfanna í öllu sínu veldi, opna sál sína fyrir orkunni og hverfa frá amstri daganna.

Dagleiðir: 5 - 6 klst.
Heildargönguvegalengd: 80 km.
Gönguhæð: 150 - 600 m.
Mesta hækkun: 200m.

Búnaðarlisti

Innifalið : Leiðsögn, matur í 7 daga (hvorki morgunverður á fyrsta degi né kvöldverður á síðasta degi) gisting 2 nætur á hóteli og 4 nætur í fjallaskálum, eldunar og mataráhöld, flutningur á farangri, ferðir frá Reykjavík að Kirkjubæjarklaustir og frá Kirkjubæjarklaustri til Reykjavíkur.

Hafa í huga : Gist er í fjallaskálum í óbyggðunum en fyrstu og síðustu nótt eyðum við á hóteli á Kirkjubæjarklaustri. Þar snæðum við kvöldverð á fyrsta og síðasta degi ferðarinnar.
Upphafsstaður : BSÍ Reykjavík.

Hápunktar

Verð frá132.000 kr.

Dagur1:
Þátttakendur hittast á BSÍ þar sem rútan austur í Skaftafell leggur af stað klukkan 08:30. Leiðin liggur eftir suðurströndinni með hefðbundnum stoppum við Seljalandsfoss, Skógafoss og í Vík í Mýrdal áður en við komum að Kirkjubæjarklaustri þar sem við gistum á hóteli fyrstu nóttina.Hæglega má fara í stutta gönguferð fyrir kvöldmatinn eða hreiðra um sig á hótelinu. Kvöldverður á hótelinu.

Dagur 2:

Við yfirgefum hótelið og höldum Lakarútuna klukkan 09:30. Á leiðinni í Laka skoðum við fyrst mögnuð gljúfur Fjaðrár og svo fossinn í Geirlandsá, sem margir telja fegursta foss landsins, sjálfan Fagrafoss. Komið er að Laka um hádegisbil og eftir hádegisverð í þessu heillandi umhverfi göngum við á Laka en á toppi hans er ómótstæðilegt útsýni yfir gígaröðina sjálfa. Leiðin liggur svo með rútunni í Tjarnargíg, einn fallegasta gíg svæðisins. Frá Tjarnargíg hefjum við göngu dagsins og höldum suður í Hrossatungur. Ganga um hraunflæmið er ógleymanleg enda fjöldi gíga og hraunmynda sem ber fyrir augu. Í Hrossatungum göngum við fram á gervigíga og graslendi og gistum í skálanum í Hrossatungum.
Akstur : 3 klst. Göngutími: 5 klst.

Dagur 3:
Trússbíllinn flytur okkur fyrsta spöl dagsins norður að Varmá, fallegri lindá sem sprettur undan hrauninu. Við höldum áfram á tveim jafnfljótum og stefnum á glæsilega Uxatinda og skoðum gljúfur Skaftár undir þeim og þau undur sem þar er að finna. Við höldum um Kambagíga að heillandi tjörnum Lyngfellsgíga þar sem eilífðin virðist vera við völd. Við höldum svo um Kambahrygg yfir að Kamba- og Lambavatni þar sem trússbíllinn bíður okkar og flytur okkur í Hrossatungur.
Akstur: 30 mín Göngutími: 6 klst.

Dagur 4:
Í dag könnum við nánar hraunbreiðuna sem myndaðist í Síðueldum 1783 – 1784. Hraunið er heillandi heimur enda ekki allt sem sýnist og margt leynist í þessari miklu hraunbreiðu. Eftir að hafa skoðað nægju okkar tökum við stefnuna á Blágil þar sem við gistum.
Göngutími: 5 klst.

Dagur 5:
Dagurinn hefst með því að við vöðum Hellisána og leggjum svo á brattann á Bárðarhnúka. Í góðu veðri má njóta þaðan óviðjafnanlegs útsýnis til hjarnbreiðu Vatnajökuls. Við höldum svo áfram um Rauðhól og niður í austur hluta Eldhrauns að Miklafelli þar sem við gistum í gangnamannaskála þar sem margir telja sig verða vara við reimleika.
Göngutími: 6 – 7 klst.

Dagur 6:
Frá Miklafelli er auðveld ganga austur að Hverfisfljóti þar sem drunur kraftmikilla fossa gefa forsmekkinn að því sjónarspili sem bíður okkar. Við fylgjum ánni og fossafjöld hennar og njótum þessa ótrúlega afls sem í ánni býr og stórbrotinnar umgerðarinnar. Við ljúkum göngunni þegar við komum aftur inn í Eldhraunið þar sem okkar bíður bíll sem flytur okkur á Hótel Laka í tæka tíð fyrir hlaðborði kvöldsins.

Akstur: 45 mín. Göngutími: 5 – 6 klst.

Dagur 7:
Brottför frá Kirkjubæjarklaustri 09:30. Við höldum til baka til Reykjavíkur um Fjallabak og skoðum Eldgjá og eigum þess kost að baða okkur í Landmannalaugum áður en við komum til höfuðborgarinnar klukkan 19:00.
Akstur : 6 stundir Göngutími: 1 – 2 klst.