Dagur 1: Flogið frá Reykjavík til Constable Point á Austur Grænlandi. Þaðan tökum við áætlunarþyrluna til Ittoqqortoormiit, litskrúðugs 600 manna grænlensks þorps sem stendur við mynni Scoresby Sunds, stærsta fjarðar í heiminum. Eftir stutt stopp í þorpinu leggjum við af stað með hundasleðum inn á Liverpoolland. Við nemum staðar í uþb 700 metra hæð nánast í miðju Liverpoollands og sláum upp tjöldum áður en fyrsti tindurinn er klifinn og forsmekkurinn af skíðun næstu daga kemur í ljós.
Dagar 2-6: Þessa daga förum við í fjölbreyttar skíðaferðir þar sem hægt er að velja um fjölda skíðaleiða í ómótstæðilegu landslagi. Roscoe fjöllin, syðsti hluti Liverpoollands er kjörinn fyrir fjallaskíðaferðir. Nálægt tjaldbúðunum eru hæstu fjöll Liverpoollands, Krosbjerg 1400 metra hátt og Tvillingerne 1430 metra hátt. Fjallstindarnir liggja þétt saman þannig að á afmörkuðu svæði má finna ótal skíðaleiðir af ölíkum erfileikastigum og aðeins lítill hluti þeirra hefur verið skíðaður.
Dagur 7: Um morguninn pökkum við farangrinum saman áður en við höldum í skíðaferð dagsins. Eftir að hafa gengið á nálægan tind er skíðað niður að sjávarmáli. Þar bíða hundasleðarnir með farangur hópsins tilbúnir að draga okkur til byggða þar sem slegið er upp veislu um kvöldið. Fyrir þá úthaldsbestu er tilvalið að skella sér á grænlenskt sveitaball um kvöldið.
Dagur 8: Um morguninn förum við í skoðunarferð um Ittoqqortoormiit, áður en við tökum þyrluna á flugvöllinn í Constable Point þaðan sem við fljúgum heim til Íslands.