Bakpokaferð í heimsklassa - Lakasvæði, Núpstaðarskógur, Skaftafell, Skeiðarárjökull

Hápunktar

Verð frá166.000 kr.

Alvöru bakpokaferð um upplönd Síðu og Hverfis

Alvöru bakpokaferð um eitt stórkostlegasta svæði landsins þar sem ferðalangur skynjar vel andstæður elds og ísa og hvernig þessi náttúrufyrirbæri hafa tekist á í mótun landsins frá örófi alda.
Stórbrotið og síbreytilegt landslag er rammi þessarar bakpokaferðar. Drjúgur spotti er gengin á jökli til þess að krækja fyrir tvö af stærri jökulfljótum landsins. Gengið er frá Laka um Eldborgirnar, yfir Hverfisfljót og Djúpá með og á jaðri Síðujökuls, um Beinadal og Núpsárhraun, og síðan niður með Núpsárgljúfrum. Haldið áfram yfir í tröllsleg fjöll í baklandi þjóðgarðsins í Skaftafelli. Gengið er upp með Núpsárgljúfrum upp að Grænalóni, aðþrengdu jökulstífluðu vatni milli Eggja og Grænafjalls. Ein mesta íselfur landsins, Skeiðarárjökull, er þveruð á einum degi og í dagslok er gist á einhverjum stórkostlegasta tjaldstað sem fyrir finnst. Þessi ferð býður upp á ólíka þætti íslensks náttúrufars og skilur eftir upplifanir sem endast.
Ein flottasta leið Íslenskra Fjallaleiðsögumanna frá upphafi. Ferð sem sameinar ólíka þætti íslenskrar náttúru og býður upp á fjölbreytt gönguland og ,agnaða upplifun.

Heildar gönguvegalengd: 125 km.
Göngutími á dag: 6-9 klst.
Hæð: 200-1100 m.
Mesta hækkun: 450 m.

Búnaðarlisti

Innifalið : Leiðsögn, akstur frá Kirkjubæjarklaustri í Laka, tjöld, matur, eldunaráhöld og annar nauðsynlegur jöklabúnaður.
Hafa í huga : Ferðin hefst á Kirkjubæjarklaustri og endar í Skaftafelli, því er nauðsynlegt að gera ráð fyrir gistingu á eða við Kirkjubæjarklaustur kvöldið fyrir ferðina.
Upphafsstaður : Kirkjubæjarklaustur.

Hápunktar

Verð frá166.000 kr.

Dagur 1: Hópurinn hittist við Skaftárskála kl. 9 um morguninn. Ekið frá Kirkjubæjarklaustri með áætlunarrútu að Lakagígum. Gengið á Laka og horft yfir víðáttumikil hraun og gígaraðir þessarar mögnuðu gosraðar. Eftir að hafa notið mikilfenglegs útsýnisins til hlítar er haldið austur og norður fyrir fjallið Blæng og áfram að vatninu við Innri-Eyrar þar sem tjaldað er í hraunbolla með útsýni yfir nánast allan Síðujökulinn.
Göngulengd: 10-15 km.    Göngutími: 5-7 klst.

Dagur 2: Í dag er glímt við vatnsföll og jökla. Undanfarin ár hefur Hverfisfljótið verið með öllu óvætt og því verið tölt upp á Síðujökulinn til þess að krækja fyrir það. En þó að Hverfisfljótið sé ekki vaðið, bíða okkar önnur vöð eftir að jökli sleppir enda kemur óhemju vatn undan sjálfum jöklinum. Eftir vatnssull í Fossahrauni er trúlega langt liðið á dag og því trúlega best að skyggnast um eftir hentugu tjaldsvæði skammt frá Djúpárkvíslunum.
Göngulengd: 15-18 km.    Göngutími: 7-9 klst.

Dagur 3: Í býtið er haldið upp á Síðujökul, til þess að krækja fyrir Djúpána, sem er engu síðra vatnsfall en Hverfisfljótið um þessar mundir. Hitt er þó ljóst að ganga á jökli kemur ekki í veg fyrir vatnssull eða vöðslur og yfirleitt er það eingöngu á færi kunnugra að komast klakklaust yfir vatnsföll af þessu tagi. Þegar Djúpáin er að baki er haldið niður í Beinadal sem ber nafn af örlögum kinda sem lent hafa þar í hörðum hretum og orðið úti. Nafnið kann að vera kaldranalegt en þarna leynast þægilegir grónir krikar í skjóli hrauna og seint í júlí lita eyrarósabreiður dalbotninn bleikan.
Göngulengd: 15-18 km.    Göngutími: 6-8 klst.

Dagur 4: Gengið suður í mót um brunahraun og jökulsorfnar hlíðar áður en haldið er ofan í tröllsleg Skessutorfugljúfrin. Þar getur að líta stórkostlegar kynjamyndir sem fá hugann til þess að reika og gott ef ekki að votti fyrir skugga af skessu hér og hvar. Í dagslok bíður enn eitt mikilfenglegt tjaldstæði göngufólks.
Göngulengd: 10-15 km.    Göngutími: 6-7 klst.

Dagur 5: Stórfengleg gljúfur Núpsár eru skoðuð áður en gengið er niður fyrir Kálfsklifið í hina raunverulegu Núpsstaðarskóga. Þessi skógivaxni dalur er leynd perla, innilokaður af jökulánum Súlu og Núpsá annarsvegar, og sjálfum Lómagnúp hinsvegar.
Göngulengd: 12-18 km.    Göngutími: 6-7 klst.

Dagur 6: Gengið er meðfram stórkostlegum gljúfrum Núpsár sem víða eru yfir 100 metra djúp. Tjaldað rétt ofan við Skessutorfugljúfrin (efsta hluti Núpsárgljúfra) þar sem fálki og refir ráða ríkjum.
Göngulengd: 15-20 km.    Göngutími: 6-7 klst.

Dagur 7: Í dag er gengið um heiðalöndin alla leið inn undir jökul, fyrir enda Grænalóns og tjaldað austarlega í Grænafjalli á gömlum vatnahjalla þaðan sem gott útsýni er yfir Skeiðarárjökul og Grænalón. Ef tími vinnst til og aðstæður leyfa er farið í skoðunarferð að ölkeldunum í Taumagili.
Göngulengd: 18-22 km.    Göngutími: 6-7 klst.

Dagur 8: Við leggjum á Skeiðarárjökulinn í dag og kynnumst heillandi landslagi þessa víðáttumesta skriðjökuls landsins. Um er að ræða ríflega 15 km göngu á tiltölulega flötum ís, þar sem einu kennileitin eru sanddrýli og garðar. Þegar komið er aftur á fast land í Norðurdal í Skaftafellsfjöllum, bíður tilkomumikill náttstaður milli jökuls og snarbrattra tinda, að mati margra einn sá flottasti í heimi.
Göngulengd: 18-22 km.    Göngutími: 7-8 klst.

Dagur 9: Á þessum síðasta degi ferðarinnar er gengið yfir Skaftafellsfjöllin um líparítgular Kjósareggjarnar, þar sem útsýnið gerir öll orð máttvana. Haldið er ofan Vesturdal niður í Bæjarstaðarskóg og þaðan yfir Morsárdal og Skaftafellsheiðina. Ferðalok í Skaftafelli undir kvöld.
Göngulengd: 20-25 km.    Göngutími: 7-8 klst.