Dagur 1: Ekið frá Kirkjubæjarklaustri að Lakagígum. Gengið á Laka
og horft yfir víðáttumikil hraun og gígaraðir þessarar mögnuðu gosraðar.
Eftir að hafa notið mikilfenglegs útsýnisins til hlítar er haldið
austur og norður fyrir fjallið Blæng og áfram að vatninu við
Innri-eyrar þar sem tjaldað er í hraunbolla með útsýni yfir nánast allan
Síðujökulinn.
Dagur 2: Í dag er glímt við vatnsföll og jökla. Undanfarin ár
hefur Hverfisfljótið verið með öllu óvætt og því verið tölt upp á
Síðujökulinn til þess að krækja fyrir það. En þó að Hverfisfljótið sé
ekki vaðið, bíða okkar önnur vöð eftir að jökli sleppir enda kemur
óhemju vatn undan sjálfum jöklinum. Eftir vatnssull í Fossahrauni er
trúlega langt liðið á dag og því trúlega best að skyggnast um eftir
hentugu tjaldsvæði skammt frá Djúpárkvíslunum.
Dagur 3: Í býtið er haldið upp á Síðujökul, til þess að krækja fyrir
Djúpána, sem er engu síðra vatnsfall en Hverfisfljótið um þessar mundir.
Hitt er þó ljóst að ganga á jökli kemur ekki í veg fyrir vatnssull eða
vöðslur og yfirleitt er það eingöngu á færi kunnugra að komast
klakklaust yfir vatnsföll af þessu tagi. Þegar Djúpáin er að baki er
haldið niður í Beinadal sem ber nafn af örlögum kinda sem lent hafa þar í
hörðum hretum og orðið úti. Nafnið kann að vera kaldranalegt en þarna
leynast þægilegir grónir krikar í skjóli hrauna og seint í júlí lita
eyrarósabreiður dalbotninn bleikan.
Dagur 4: Gengið suður í mót um brunahraun og jökulsorfnar hlíðar áður
en haldið er ofan í tröllsleg Skessutorfugljúfrin. Þar getur að líta
stórkostlegar kynjamyndir sem fá hugann til þess að reika og gott ef
ekki að votti fyrir skugga af skessu hér og hvar. Í dagslok bíður enn
eitt mikilfenglegt tjaldstæði göngufólks.
Dagur 5: Stórfengleg gljúfur Núpsár eru skoðuð áður en gengið er
niður fyrir Kálfsklifið í hina raunverulegu Núpsstaðarskóga. Þessi
skógivaxni dalur er leynd perla, innilokaður af jökulánum Súlu og Núpsá
annarsvegar, og sjálfum Lómagnúp hinsvegar. Svo sannarlega staður til
þess að njóta og það er því með semingi sem við ljúkum ferðinni og
höldum akandi úr skógunum að Kirkjubæjarklaustri